تا ئێستا هیچ وادەیەک بۆ کردنەوەی دەرگای خوێندنگەکان دیارینەکراوە
SNN-مەودا مستەفا
وەزیری پەروەردەی حکومەتی هەرێمی کوردستان رایدەگەیەنێت: تاوەکو ئێستا هیچ وادەیەک بۆ دەسپێکردنەوەی ساڵی نوێی خوێندن دیارینەکراوە، هەروەها شێوازی خوێندنەکەش دیارینەکراوە.
ئالان حەمە سەعید وەزیری پەروەردەی حکومەتی هەرێمی کوردستان رایگەیاند: راستە دوێنی کۆبوونەوەیەک لەنێوان وەزارەتی تەندروستی و خوێندنی باڵا و پەروەردە هەبووە بۆ چۆنیەتی دەستپێکردنەوەی پرۆسەی خوێندن، بەڵام تاوەکو ئێستا هیچ بڕیارێک لەبارەی کاتی دەستپێکردنەوەی دەوام لە ناوەندەکانی خوێندن نەدراوە.
وتیشی: ئەنجومەنی وەزیران دەتوانێت ئەو پێشنیارانەی ئێمە کردومانە یەکێکیان هەڵبژێرێت و بڕیاری لەسەر بدات، ئێمەش کۆمەڵێک پێشنیازمان ئامادەکردوە لە چەند رۆژی داهاتوو ئەنجومەنی وەزیران کۆدەبێتەوە و بڕیاری کۆتایی لەسەر دەدات.
بەهۆی بڵاوبوونەوەی ڤایرۆسی کۆرۆنا و دروستکردنی مەترسی تەندروستیی لەسەر خوێندکاران، دەرگای خوێندنگاکان زووتر لە وادەی خۆی داخرا و هەر بەهۆی مەترسی کۆرۆناوە تاوتوێی کاتی دەستپێکردنەوەی خوێندن و شێوازی خوێندن دەکرێت.
