لیژنەی دارایی سەرقاڵی ئامادەکردنی راپۆرتێکە لەبارەی دەروازە سنوریەکان

SNNـ بڕیار محەمەد

سەرۆکی لیژنەی دارایی لەپەرلەمانی کوردستان ڕایگەیاند: لەچەند ڕۆژی رابردوو سەردانی چەند دەروازیەکمان کردووە، هەروەها سەردانی دەروازەی حاجی ئۆمەران دەکەین و لە کۆتایشدا ڕاپۆرتێک دەدینە دەستەی سەرۆکایەتی پەرلەمان.

زیاد جەبار سەرۆکی لیژنەی دارایی لەپەرلەمانی کوردستان بە SNNی ڕاگەیاند: دیارە ماوەی چەند ڕۆژێکە لیژنەی دارایی سەرقاڵی ئامادەکردنی ڕاپۆرتێکی تێر و تەسەلە لەبارەی کەم و کورتی دەروازە سنوریەکانی هەرێمی کوردستان، بەیانیش سەردانی دەروازەی حاجی ئۆمەران دەکەین بۆ ئەوەی لەنزیکەوە کەم و کورتی خاڵە سنوریەکان بزانین .

وتیشی “دوای تەوابوونی سەردانەکەشمان ڕاپۆرتێکی گشتگیر لەبارەی تەواوی کەم و کورتی خاڵە سنوریەکان دەدەینە دەستەی سەرۆکایەتی، بۆ ئەوەی ئەوانیش پێشکەشی حکومەتی هەرێمی کوردستان وەزارەتی دارایی بکەن تا ئەوانیش کاری لەسەر بکەن و چارەسەری کێشەکان بکەن”.

ئەوەشی خستەڕوو، “لە کۆتایی راپۆرتەکە بڕیار لەسەر بانگێشتکردنی وەزیری دارایی دەدەین یاخود تەنها ڕاپۆرتەکە دەدەینە دەستەی سەرۆکایەتی پەرلەمان و بێگومان ئێمە بڕیارمانداوە تەواوی دەروازە سنوریەکانی هەرێمی کوردستان لەگەڵ وڵاتانی دراوسێ بەسەر بکەینەوە”.