زیندانیانی سیاسی داوایی گواستنەوەی دۆسییەکانیان دەکەن بۆ عێراق

SNNـ بڕیار محەمەد

بەمەبەستی گواستنەوەی دۆسییەکانیان بۆ سەر دەزگای زیندانیە سیاسییەکانی عێراق ژمارەیەک لە زیندانیانی سیاسی یاداشتێکیان ئاراستەی لیژنەی کاروباری شەهیدان و زیندانیانی سیاسی پەرلەمانی کوردستان کرد.

عەلی محەمەد سەرۆکی کۆمکاری زیندانە سیاسییەکانی کوردستان لەکۆنگرەیەکی ڕۆژنامەنووسیدا ڕایگەیاند: ئەمڕۆ هاتووین بۆ ئەوەی لەگەڵ لێژنەی شەهیدان و زیندانیانی سیاسی پەرلەمانی کوردستان کۆببینەوە لە کۆبوونەوەکەدا داوامان کردووە کە دۆسییەکانمان بگوازرێتەوە بۆ سەر دەزگای زیندانیانی سیاسی عێراق.

وتیشی “داوایەکی تریشمان لە لیژنەکە کردووە کە بریتی بووە لە هەمووارکردنەوەی یاسای ژمارە 11ی ساڵی 2011، چونکە هەستدەکەین لە ئێستادا ئەو یاسایە پێویستی بەهەمووارکردنەوە هەیە”.

شایەنی باسە لە حکومەتی عێراقی منحەی زیندانیانی سیاسی بۆ ماوەی 25 ساڵ دەدرێت بە زیندانیانی سیاسی، بەڵام لە هەرێمی کوردستان تەنها بۆ ماوەی 10ساڵە.