سەبارەت بە تایبەتكردنی سێكتەری دابەشكردنی كارەبا وەزارەتی كارەبا روونکردنەوە دەدات

SNN

وەزارەتی کارەبا رایدەگەیەنێت “هەندێك لەدەزگاكانی راگەیاندن بەمەبەست یاخود بێ زانیاری و شێواندنی لێدوانی بەرپرسانی كارەبا هەواڵ و راپۆرت سەبارەت بە بەتایبەتكردنی سێكتەری دابەشكردنی كارەبای نیشتمانی بڵاودەكەنەوە”.

دەشڵێت: “ئەو هەواڵانە بووەتە هۆی دڵەڕاوكێ و پرسیار لای هاوبەشانی كارەبا”.

وەزارەتەکە راشیدەگەیەنێت “بۆ بەرچاو روونی هاووڵاتییان بەپێویستی دەزانین ئەم چەند زانیارییەی خوارەوە بڵاوبكەینەوە كە سەرجەم ئەم هەنگاو و پرۆسەیە لەخزمەتی هاووڵاتییانی كوردستاندایە”.

لە روونکردنەوەکەدا هاتووە “بەتایبەتكردنی كەرتی دابەشكردنی كارەبا راستەوخۆ لەلایەن وەزارەتی كارەبا چاودێریی و سەرپەرشتی دەكرێت و نرخی كارەبا لەسەر هاوبەشانی كارەبا زیاد ناكرێت”.

دەشڵێت: “ئەو پرۆسەیە دەبێتەهۆی باشتر كۆنترۆڵكردنی سیستەمی بەڕێوەبردنی كارەبا و  رێگرە لە بەفیڕۆدانی وزەی كارەبا و كەمبوونەوەی پاڵەپەستۆ لەسەر تۆڕ و وێستگەكان و كەمبوونەوەی كاری چاكسازیی و سووتانی محاویلەكان”.

ئاماژە بەوەشدەکات “كەمكردنەوە و نەهێشتنی سەرپێچییەكانی كارەبا دێتە ئاراوە و بەمەش دادپەروەریی لە دابەشكردنی كارەبا زیاتر دەستەبەر دەكرێت”.

دەشڵێت: “ماوەكانی پێدانی كارەبای نیشتمانی بەتایبەتی لەهەردوو وەرزی هاوین و زستان دا زیاد دەکات بەڕێژەی 70% و  فەرمانبەرانی وەزارەتی كارەبا لەو سێكتەرە كار دەكەن بەتەواویی ئیمتیازاتەكانیان كار دەكەن و كۆمپانیاكان پابەند دەبن بەدابینكردنی مووچەكانیان لەكاتی خۆیدا”.