لە هەرێمی کوردستان دیاردەیەکی ناشرین بەهۆی کۆرۆناوە مەترسی بۆ سەر ژیان دروستکردووە

SNN- محەمەد مستەفا

ماوەیەکە لە سنووری ئیدارەی ڕاپەرین بەشێک لە هاووڵاتییان دوای ناشتنی مردووانی کۆرۆنا یان جێهێشتی سەنتەرەکانی کۆرۆنا، پێخەف و پێداویستییەکانی نەخۆشەکان لە نزیک شوێنە گشتییەکان فڕێدەدەن .

تەها محەمەد بەرپرسی راگەیاندنی تەندروستیی راپەڕین بە SNN ی راگەیاند: لە لایەن هاووڵاتییانەوە ئاگادار کراونەتەوە کە لە چەندین شوێنی ڕاپەڕین بەشێک لە هاووڵاتییان دوای جێهێشتنی سەنتەرەکانی کۆرۆنا پێخەف و پێداویستییەکانی تووشبووانی کۆرۆنایان لە نزیک سەنتەرەکانی ئەو ڤایرۆسە و شوێنە گشتییەکان فڕێدەدەن .

وتیشی: “ئەم حاڵەتە لە گۆڕستانەکانی ڕاپەڕینیش بەدیکراوە کاتێک نەخۆشێک بەهۆی کۆرۆناوە کۆچی دواییکردووە کەس و کارەکەی پێخەفەکەیان لەناو گۆڕستانەکە فڕێداوە و ئەم کارەش مەترسییە بۆ سەر تەندروستی گشتی .”

ئاگاداری هاووڵاتییانی ڕاپەڕینیش دەکاتەوە دوور بکەوەنەوە لەم دیاردەیە و پێویستە سەرجەم ئەو پێداویستییانە لەسەنتەرەکانی کۆرۆنا لەشوێنی تایبەت جێبهێڵن بۆ ئەوەی بەڕێکاری تەندروستی لە لایەن لیژنەیەکی تایبەتمەندەوە لەناو ببرێن.