لە نەجەف منداڵێکی دوو ڕۆژە لە خودەجدا دەسوتێت

SNN

بەڕێوەبەرایەتی تەندروستی نەجەف ئەمڕۆ شەممە هەواڵی گیان لەدەستدانی منداڵێکی 2 رۆژی لە خودەجدا بەهۆی کارەباوە راگەیاند.

سالم حەمداوی وتەبێژی بەرێوەبەرایەتی تەندروستیی نەجەف رایگەیاند: بەڕێوەبەرایەتی تەندروستی نەجەف لیژنەیەکی تایبەتی پێکهێناوە بۆ ئەو رووداوەی کە ئەمڕۆ لە نەخۆشخانەی زەهرا لە نەجەف روویداو سزای ئەو کارمەند و پزیشکانەش دەدات کە پەیوەندییان بەو رووداوەوە هەیە.

سالم ئاماژە بە رووداوەکە دەکات و دەڵێت: کاتێک منداڵەکە دەبرێتە خودەج بەهۆی ئەوەی کون لە دڵیدا هەبووە لەگەڵ چەند نەخۆشییەکی دیکە، باری تەندروستی هەر نێو ئامێری خودەجەکەدا تێکدەچێت، بۆیە پزیشکەکە بەهۆی نەبوونی ئامێری تایبەتی منداڵان بە ئامێری کارەبایی بوژاندنەوەی دڵ هەوڵی ئاسایی کردنەوەی دۆخی منداڵەکە دەدەن، بەڵام ئامێری خودەجەکە و منداڵەک و بەشێکی جستەی پزیشکەکە بەهۆی شۆرتی کارەباییەوە دەسوتێن.

دەشڵێت: خێزانی منداڵەکە لە هۆکاری رووداوەکە تێگەیشتوون، ئێمەش لیژنەیەکی تایبەتمان بۆ ئەم رووداوە پێکهێناوە، تا دەگەینە ئەنجام.