هەولێر… خۆراك بەسەر 107 هەزار خێزاندا دابەشدەکرێت
SNN- بڕیار محەمەد
حكومەتی هەرێمی كوردستان و كۆمپانیای رۆزنەفت هاوکاری دەدەنە 312 هەزار خێزان لە هەرێمی كوردستان و ئەمڕۆ یەکشەممە دەستكراوە بە دابەشكردنی خۆراك بەسەر 107 هەزار خێزاندا.
یوسف چاوشین بەڕێوەبەری گشتی چاودێری و گەشەپێدانی كۆمەڵایەتی هەولێر بەSNNی ڕای گەیاند “لەمڕۆوە دەستكراوە بە دابەشكردنی خۆراك بەسەر 107 هەزار خێزاندا لە سنووری پارێزگای هەولێر”.
ئەم هاوكارییە لە چوارچێوەی هاوكاری گشتی حكومەتی هەرێمی كوردستان و كۆمپانیای رۆزنەفتدایە بۆ 312 هەزار خێزان لە هەرێمی كوردستان و برنج و زەیت لە خۆ دەگرێت.
وتیشی: “ئەو خۆراكە بەسەر منداڵانی بێ سەرپەرشت، بێوەژن، كەمئەندام، كرێكار، بێكار، كرێچی و ئەو كەسانەدا كە سەرۆك خێزانیان بەند كراوە، دابەشدەكرێت، لیستی ناوەكان بە هاوكاری و هەماهەنگی پارێزگای هەولێر ئامادە كراوە و لە ڕێگەی بریكارەكانی خۆراكەوە بەسەر خێزانەكاندا دابەشدەكرێت”.
ئاماژەی بەوەشكرد، بەمزووانە هاوكارییەكی تری 100 هەزار دیناری بەسەر خێزانە هەژار و كەمدەرامەتەكان دابەشدەكرێت، لیستی ناوەكانمان ئامادە كردووە تەنها چاوەڕێی وەزارەتی دارایین چەند بانكێكمان بۆ دەستنیشانبكات بۆ دابەشكردنی ئەم هاوكارییەش بەسەریاندا.
