خوێندنی باڵا یاسای بنەماکانی یەکسانکردنی بڕوانامەکان رەتدەکاتەوە

SNN

وەزارەتی خوێندنی باڵا رایگەیاند، یاسای بنەماکانی یەکسانکردنی بڕوانامەکان کە لە 28ی ئەم مانگەدا لەلایەن پەرلەمانی عێراقەوە دەنگی لەسەردراوە رەتدەکاتەوە. 

وەزارەتی خوێندنی باڵا و توێژینەوەی زانستی هەرێمی کوردستان لە راگەیەنراوێکدا ئاماژەی بەوەکردووە، داوا لە سەرۆک کۆماری عێراق دەکات ئەو یاسایە بەو فۆرمەی ئێستا پەسەند نەکات.

خوێندنی باڵای هەرێم دەڵێت: “ناوەڕۆکی ئەم یاسایە پێچەوانەی بەهاو بنەما زانستییە رەسەنەکانی یەکسانکردنی ئەو بڕوانامانەیە کە لەدەرەوەی وڵات بەدەست دەهێنرێن، لەم یاسایەدا کۆمەڵێک پێوەری زانستی گرنگ لە پرۆسەی یەکسانکردنی بڕوانامەکان فەرامۆشکراوە”.

دەشڵێت: ئەو فەرامۆشکردنە زیانی گەورە بە ئاست و ناو و ناوبانگی پرۆسەی خوێندنی باڵاو بەها و پیرۆزییەکانی بڕوانامەی زانستی دەگەیەنێت و پێچەوانەی بنەماکانی دادپەروەری کۆمەڵایەتییە، سەرباری ئەمانەش یاساکە بەبێ ڕەچاوکردنی راو و تێبینیەکانی لایەنە پەیوەندیدارەکان تێپەڕێنراوە.

پێشتر پەرلەمانی عێراق دەنگیدا لەسەر پرۆژەیاسایەک کە تێیدا، رێگە دەدرێت بە هەڵگرانی بڕوانامەی وڵاتانی بیانی و عەرەبی تا مامەڵەی یەکسانکردنی بڕوانامەیان بۆ بکرێت.