هێزەکانی ئەمریکا لە عێراق دەکشێندرێنەوە

SNN

ماڵپەڕی سی ئێن ئێنی ئەمریکی ئاشکرایکردووە، لەم هەفتەیەدا بڕیار لەسەر کشانەوەی بەشی زۆری هێزەکانی ئەمریکا لە عێراق و ئەفغانستان دەدرێت.

دوو بەرپرسی ئەمریکی ئاگادار رایانگەیاندووە، فەرماندە سەربازییەکانی ئەمریکا ئاگادارکراونەتەوە لەوەی لەم هەفتەیەدا فەرمانیان پێدەکرێت بە کشانەوەی بەشی زۆری هێزەکانی ئەمریکا لە عێراق و ئەفغانستان، بە جۆرێک دوو هەزار و 500 سەرباز لە عێراق و دوو هەزار و 500 لە ئەفغانستان دەکشێندرێنەوە، بڕیارەکەش دەبێت تا 15ی کانوونی دووەم جێبەجێ بکرێت.

ئەمە لەکاتێکدایە ئێستا سێ هەزار سەربازی ئەمریکی لە عێراق و چوار هەزار و 500 سەربازیان لە ئەفغانستان بوونی هەیە.

کشانەوەی هێزەکانی ئەمریکا یەکێک بوو لە پلانە سەرەکییەکانی دۆناڵد ترەمپ بە ئامانجی “کشانەوەی ئەمریکا لە جەنگە ناکۆتاکان”.