وەزیری تەندروستی و سەرجەم بەڕێوەبەرە گشتییەکان دەچنە پەرلەمان

SNNـ بڕیار محەمەد 

ئەندامێكی لیژنەی تەندروستی لە پەرلەمانی كوردستان ڕایدەگەیەنێت “وەزیری تەندروستی و سەرجەم بەرپرسانی تەندروستی سبەینێ دووشەممە لە پەرلەمان ئامادە دەبن”.

شنۆ ئەشقی ئەندامی لیژنەی تەندروستی لە پەرلەمانی كوردستان بە SNNی ڕاگەیاند، سبەی وەزیری تەندروستی و سەرجەم بەڕێوەبەری تەندروستی شارەكان و بەڕێوەبەری گشتی كۆنترۆڵی دەرمان سەردانی پەرلەمان دەكەن و لەگەڵ لیژنەکەمان کۆدەبنەوە .

وتیشی: “لەماوەی ڕابردوو چەندین سەرنج و تێبینیمان لەسەر کەرتی تەندروستی هەبووە، بۆیە بە باشمانزانی بانگهێشتی وەزیری تەندروستی و بەڕێوەبەری تەندروستیی شار و شارۆچکەکان بکەین”.

ئاماژەی بەوەشکرد “ئامانجێکی تری بانگهێشتی وەزیری تەندروستی بۆ ئەوەیە هەڵسەنگاندن بۆ ڕەوشی تەندروستی هەرێمی كوردستان بكرێت لە بابەتی بەرەنگاربوونەوەی ڤایرۆسی كۆرۆنا”.

لە كۆبوونەوەكەدا گفتوگۆش لەسەر ئەو كۆمەك و یارمەتییانە دەکرێت لەلایەن ڕێكخراوەکان و وڵاتانی دنیا پێشكەشی تەندروستی هەرێمی كوردستان كراوە کە ئایا چۆن دابەشكراوە، تا چەندە بەشێوەیەکی یەکسان دابەشکراوە .

هاوکات لە بەشێكی كۆبوونەوەكەدا باس لە كوالێتی دەرمان دەكرێت لە هەرێمی كوردستان و دەمانەوێت بزانین ئێستا كوالێتی دەرمان چۆنە و ڕێكارەكان چۆن جێبەجێ‌ كراون.