لە هەڵەبجە دوو هاوڵاتی لە ماڵێکدا كوژران

SNN-عەلی حەمە سەعید
بەرەبەیانی ئەمڕۆ لە گەڕەكی هاوارییەكانی شاری هەڵەبجە دوو هاوڵاتی لە ماڵێكدا كوژران كە یەكێك لە كوژراوەكان تووشی كۆرۆنا بووە و خۆی كەرنتینە كردووە، هاوكات بەمەبەستی لێكۆڵینەوە تەرمەكانیان ڕەوانەی پزیشكی داد كراوە و پۆلیسیش لێكۆڵینەوەی لە ڕووداوەكە دەستپێكردووە.

بە گوێرەی زانیارییەكانی SNN بەرەبەیانی ئەمڕۆ هەینی لە گەڕەكی هاوارییەكانی شاری هەڵەبجە، دوو هاوڵاتی بەناوەكای (د. ش) و (هـ . أ) لە ماڵی خوشكێكی (د . ش) تەرمەكانیان بە كوژراویی دەدۆزرێتەوە، هاوكات یەكێك لە كوژراوەكان تووشی نەخۆشی كۆرۆنا بووە و خۆی كەرەنتینە كردووە و كەسانی نەناسراو هەڵیكوتاوەتە سەریان و هەردووكیانی كووشتووە.

تا ئێستا هۆكاری ئەنجامدانی ئەو ڕووداوە ئاشكرا نەكراوە و بەمەبەستی لێكۆڵینەوەی زیاتر تەرمەكانیان ڕەوانەی پزیشكی دادی هەڵەبجە كراوە، هاوكات پۆلیسش لێكۆڵینەوەیان لە ڕووداوەكە دەستپێكردووە و دۆسیەی لێكۆڵینەوەیان بۆ كراوەتەوە.

SNNچەند جارێك پەیوەندی بە پۆلیسی پارێزگای هەڵەبجەوە كرد، بەڵام بەهۆی سەرقاڵبوونیان بە ڕووداوەكە ئامادە نەبوون زانیاری زیاتر بخەنەڕوو.