پێنج فراکسیۆنی پەرلەمان یاداشتێک دەدەنە سەرۆکایەتی پەرلەمان

پێنج فراکسیۆنی پەرلەمانی کوردستان کۆبوونەوە سەبارەت بە ناڕەزایەتییەکانیان لەبارەی هەڵگرتنی پارێزبەندی لەسەر سۆران عومەر و لەوبارەیەوە یاداشتێک دەدەنە پەرلەمان.

عەبدولستار مەجید سەرۆکی فراکسیۆنی کۆمەڵی ئیسلامی بە میدیاکانی راگەیاند، فراکسیۆنەکانی یەکێتی، گۆڕان، یەکگرتوو، ئازادی و کۆمەڵی ئیسلامی و  سەربەخۆکان لەبارەی ناڕەزایەتییەکانیان سەبارەت بە کۆبوونەوەی حەوتی ئەم مانگە، کە پارێزبەندی لە پەرلەمانتار سۆران عومەر هەڵگیرا، کۆبوونەتەوە.

راشیگەیاند: لە دانیشتنی داهاتووی پەرلەماندا یاداشتێک دەدەینە سەرۆکایەتی پەرلەمان سەبارەت بە ناڕەزایەتییەکانمان.

لەلایەکی دیکەوە رێواز فایەق سەرۆکی پەرلەمانی کوردستان رایگەیاند: داوای کۆبوونەوەی پەرلەمان ناکەم، پەرلەمان کۆنابێتەوە تاوەکو دەبێتە شوێنی خواستی هەموو لایەنەکان.

رۆژی حه‌وتی ئه‌م مانگه‌ بەبێ بەشداری زۆرینەی فراکسیۆنەکان په‌رله‌مانی كوردستان كۆبویه‌وه‌ و پارێزبه‌ندی په‌رله‌مانتارانی خسته‌ ده‌نگدانه‌وه‌، ئه‌وه‌ش ناڕه‌زایی زۆرینه‌ی فراكسیۆنه‌كانی لێكه‌ته‌وه‌ .

هه‌ر به‌هۆی ئه‌و كۆبونه‌وه‌یه‌وه‌ نیگه‌رانی لای فراكسیۆنه‌كان و لایه‌نه‌ سیاسیه‌كان دروست بووە، به‌هۆیه‌شه‌وه‌ دانیشتنی په‌رله‌مان تاوه‌كو ئێستا نه‌كراوه‌.