ئەمڕۆ هاووڵاتیانی عێراقی لە هیندستان دەگەڕێندرێنەوە

SNN

بەهۆی خراپی رەوشی تەندروستی لە هیندستان ئەمڕۆ ئەو هاووڵاتیە عێراقییانە دەگەڕێندرێنەوە کە لەو وڵاتەن و لەژێر مەترسی تووشبوونیاندان بە جۆرێکی نوێی کۆرۆنا .

وەزارەتی بازرگانی عێراق رایگەیاند: “هاووڵاتیانی عێراقی نیشتەجێی هیندستان داوایەکی زۆریان گەیاندووەتە عێراق کە بیانگەڕێننەوە بۆ عێراق، بەوهۆیەوە فڕۆکەی تایبەت دیاریکراوە و لەدوای دڵنیابوونەوە لە تەندروستییان هەر ئەمڕۆ دەگەڕێندرێنەوە وڵاتی خۆیان”.

بەهۆی هەڵکشانی زۆری حاڵەتەکانی تووشبوون بە کۆرۆنا کەرتی تەندروستی لە هیندستان پەکیکەوتووە و حکومەت پەنای بۆ سوپای وڵاتەکە بردووە، بەشێک لە وڵاتانیش دەستی هاوکارییان بۆ وڵاتەکە درێژکردووە.

تێدرۆس ئەدهانۆم سەرۆکی رێکخراوی تەندروستی جیهانی رایگەیهاندووە: “بارودۆخی تەندروستی لە هیندستان دڵ دەهەژێنێت”، باسی لەوەشکرد رێکخراوەکە ستافی تەندروستی و کەلوپەلی تەندروستی زیاتر بۆ هیندستان دەنێرێت، بەتایبەت بوتڵی ئۆکسجین کە لە وڵاتەکەدا کورتیهێناوە”.

لە ئێستادا نەخۆشخانەکانی هیندستان جمەیاندێت لە نەخۆشی کۆرۆنا و چیتر پزیشک و کارمەندانی تەندروستی ناتوانن بەرگەی چارەسەرکردنی ئەو ژمارە زۆرەی تووشبوو بکەن.