دانیمارک ڤاکسینی جۆنسن & جۆنسن-ی قەدەغەکرد
کوتان بە ڤاکسینی کۆرۆنا
SNN
دانیمارک وەک یەکەم وڵاتی جیهان ڤاکسینی کۆرۆنای جۆری جۆنسن & جۆنسن-ی لە وڵاتەکەدا قەدەغەکرد و دەڵێت مەترسییەکانی هێندەی سوودەکەیەتی.
وەزارەتی تەندروستی دانیمارک لە راگەیەندراوێکدا دەڵێت: “بۆمان دەرکەوتووە کە ڤاکسینی جۆنسن & جۆنسن مەترسییەکانی هێندەی سوودەکەیەتی و ژمارەیەک نیشانەی لاوەکی هەیە لە نێویشیاندا خەستبوونەوەی خوێن”.
ئەم مەترسییەی ڤاکسینەکە لە چەند وڵاتێکی دیکە دەرکەوتووە و درکیان پێکردووە، لە ئەمریکاش حاڵەتی خەستبوونەوەی خوێن بەهۆی ڤاکسینەکەوە هەبووە کە دەوترێت حاڵەتێکی دەگمەنە لە خەستبوونەوەی خوێن، دەزگای تەندروستی ئەوروپی و چاودێری دەرمانی ئەوروپاش دانیان بەم مەترسیەدا ناوە.
دەزگای تەندروستی ئەوروپی EMA وتوویەتی دەبێت هاوشێوەی ڤاکسینی ئەسترازینیکا، لەسەر ڤاکسینی جۆنسن & جۆنسن بنوسرێت کە یەکێک لە نیشانە لاوەکیەکانی خەستبوونەوەی خوێنە.
ئەمە لەکاتێکدایە پێشتر دانیمارک بەکارهێنانی ڤاکسینی ئەسترازینیکای لە وڵاتەکە قەدەغەکرد بەهۆی مەترسییەکانیەوە.
