چۆمان.. بە هۆی مینەوە هاووڵاتیەک گیانیلەدەستدا
SNN
بەهۆی تەقینەوەی مینەوە لە کوێستانی بەردەبوک لە سنوری سنوری قەزای چۆمان هاووڵاتیەک گیانی لەدەستدا و دەزگای گشتی کاروباری مینیش هۆشداری دەداتە هاووڵاتیان لە چوونیان بۆ نزیک ناوچە مەترسیدارەکان.
بەپێی راگەیەنراوێکی بەڕێوەبەرایەتی دەزگای گشتی کاروباری مین رۆژی یەکەشەممە لە کوێستانەکانی بەردەبوکی سنوری قەزای چۆمان مینێکی دژە کەسی لە جۆریV69 بە گەنجێکی تەمەن 29 ساڵ بە ناوی شوان جەمال ئەحمەددا تەقیوەتەوە و بە هۆیەوە گیانی لەدەستداوە.
راشیگەیاندوە: “ئەو هاوڵاتیە بە مەبەستی کۆکردنەوەی گژ و گیای بەهارە رووی لەو ناوچەیە کردبوو”.
هەربۆیە داوای لە هاوڵاتیان کردوە، نزیکی ناوچە مەترسیدارەکان و ئەو شوێنانە نەبنەوە کە شارەزا نین.
بە هۆی شەڕ و ململانێ چەکدارییە یەک لەدوای یەکەکان بە تایبەتی شەڕی هەشت ساڵەی عێراق و ئێران و دواتر شەری داعش رووبەرێکی فراوانی ناوچەکانی هەرێمی کوردستان مینرێژکراوە و سەرباری پاککردنەوەی بەشێکی زۆر لەو رووبەرە، بەڵام تائێستا بە تەواوەتی لە مین دانەماڵڕاون و ساڵانە بە هۆیانەوە چەندین کەس دەبنە قوربانی.
