سەرۆکی پەرلەمانی عێراق لەسەر رووداوەکانی قودس هاتەدەنگ

SNN

سەرۆکی پەرلەمانی عێراق لەسەر رووداوەکانی قودس و مزگەوتی ئەقسا داوای کۆبوونەوەیەکی بەپەلەی کۆمکاری عەرەبی دەکات.

محەممەد حەلبووسی، سەرۆکی پەرلەمانی عێراق لە نوسراوێکی فەرمیدا بۆ سەقەر غباش، سەرۆکی یەکێتیی پەرلەمانتارانی وڵاتانی عەرەبی و سەرۆکی ئەنجوومەنی نیشتمانیی وڵاتی ئیمارات کردووە، تێیدا داوای لێکردووە” داوای بەڕێوەچوونی کۆبوونەوەی بەپەلەی کۆمکاری عەرەبی بکات بەمەبەستی گفتوگۆکردن لەسەر گرژییەکانی قودس و هەبوونی هەڵوێستێکی عەرەبیی یەکگرتوو و بڕیاری یەکلاییکەرەوە لەوبارەیەوە”.

لەو نوسراوەکەدا حەلبوسی ئاماژەی بەوە کردووە: “وەک نوێنەرانی گەل، سەرکۆنەی ئەو پەلامارانەی ئیسرائیل دەکەین بۆسەر نوێژخوێنان و رێگریکردن لەوەی پەرستش لەو شوێنە بکەن”.

ماوەی چەند رۆژێکە لە شاری قودس مەراسيمەکانی مانگی رەمەزان بەڕێوەدەچن و موسوڵمانانی فەڵەستين پەرستشەکانيان لە مزگەوتی ئەقسا ئەنجامدەدەن، لە چەند رۆژی رابردوودا گرژی لەنێوان پۆليسی ئيسرائيل و موسوڵمانەکانی فەلەستين دروستبووە و بەو هۆيەوە تا ئێستا زياتر لە 300 کەس برينداربوون.