دادگاییکردنی پێنج چالاکوان و رۆژنامەنووس لە هەولێر دواخرا

SNN

بڕیاربوو ئەمڕۆ یەكەم دانیشتنی دادگاییكردنی هەریەك لە (عامر خالید عەگید، فرسەت ئەحمەد سەعید، جەمال خەلیل مەجید، سلێمان كەمال سلێمان و سلێمان موسا ئەحمەد) لە دادگای دووی هەولێر بەڕێوەبچێت، بەڵام دادگاییەکە دواخرا، بڕیاری دواخستنەکە بە بیانووی ئامادەنەبوونی دادوەری سەرەکی دادگا بوو.

لەوبارەیەوە بەشدار حەسەن، پارێزەری ئەو پێنج چالاکوان و رۆژنامەنووسە وتی “ژمارەیەک تۆمەت خراوەتەپاڵ ئەو پێنج کەسە، یەکێک لە تۆمەتەکان ئەوەیە: عەمیلی ئەمریکا و بەریتانیا بوون و ئەو دوو وڵاتە ویستوویانە هێزێک دروستبکەن بۆ پاڵپشتی لە مستەفا کازمی، د.بەرهەم ساڵح، تۆمەتەکانی دیکەش بریتیە لە تێکدانی ئاسایشی گشتی و گێرەشێوێنی ئەوە پەیوەندی بە خۆپیشاندانەکانەوە هەیە”.

دادگاییکردنی چالاکوانەکانی بادینان بەردەوامە، لە ماوەی رابردوودا پێنج چالاکوان سزای شەش ساڵ زیندانییان بەسەردا سەپێندرا کە یەکێک لە تۆمەتەکانیان سیخوریکردنبوو بۆ ئەمریکا و ئەڵمانیا، دواتر لە ژێر فشاری ئەو دوو وڵاتە ئەو تۆمەتەیان  لەسەر لابرا و تۆمەتەکانی دیکەیان بەسەردا ساغکرایەوە.

هاوکات بڕیارە ڕۆژی 12-7-2021یش یەكەم دانیشتنی دادگاییكردنی (مەسعود شنگالی، شیروان ئەمین، كارگەر عەباس عەلی و بەندەوار ئەیوب) بەڕێوەبچێت. هەروەها لە 29-7-2021 هەریەك لە ئومێد بەرۆشكی و مامۆستا بەدەل بەرواری دادگایی دەكرێن.