ئاسایشی سلێمانی کەسێکیان بە تۆمەتی تیرۆر دەستگیرکرد
زیندانییهك له یهكێك له زیندانهكانى سلێمانى | فۆتۆ: ههوراز ئهحمهد / SNN
SNN
وەزارەتی بەرگری عێراق رایدەگەیەنێت، بە هەوڵی ئاسایشی سلێمانی و دەزگای زانیاری، تۆمەتبارێک بە تۆمەتی ماددەی چواری تیرۆر دەستگیرکراوە.
لە راگەیەندراوەکەی وەزارەتی بەرگریدا ئەوە هاتووە: “لەسەر بنەمای چاودێری چەند تۆمەتبارێک هەواڵگری و ئاسایشی سلێمانی توانیویانە ئەو تۆمەتبارە دەستگیربکەن”.
باس لەوەشدەکەن دەستگیرکردنی ئەو کەسە بەپێی فەرمانی دادگای لێکۆڵینەوەی خالدییە بووە لە پارێزگای ئەنبار.
بەهۆی هەماهەنگی دەزگا ئەمنییەکانی هەرێم و حکومەتی فیدراڵ، لە ماوەی رابردوودا چەندین داواکراو کە لە پارێزگاکانی عێراق تاوانیان کردووە و بۆ هەرێم هەڵاتوون، یان بە پێچەوانەوە، دەستگیرکراون و رەوانەی ئەو جێگەیە کراون کە تاوانەکانیان تیادا ئەنجامداوە بە مەبەستی دادگاییکردنیان.
رێکخراوی داعش کە لە شێوەی شانەی نوستوودان، لە چەند شوێنێکی عێراق ماون و جاروبار هێرشدەکەنە سەر هاووڵاتیان و دەزگا ئەمنییەکان، لە ئێستاشدا زنجیرەیەک هێرشیان بۆسەر وێستگە و بورجەکانی کارەبا دەستپێکردووە بەمەبەستی تێکدانی سەقامگیری لە وڵاتەکە.
