ترامپ: سکاڵا لە سەر تویتەر، فەیسبوک و گوگڵ تۆمار دەکەم

SNN

سەرۆکی پێشووی ئەمریکا دەڵێت: بەهۆی سانسۆرەوە تویتەر، فەیسبوک و گوگڵ دەداتە دادگا، ئەوە هەنگاوەشی بە وەرچەرخانێک لە بواری ئازادی رادەربڕین ناودەبات.

دۆناڵد ترامپ، سەرۆکی پێشووی ئەمریکا رایگەیاند: “بەمنزیکانە سکاڵا لەسەر تویتەر، فەیسبوک و گوگڵ تۆمار دەکەم، بە هۆی پەیڕەوکردنی سانسۆر لە لایەن ئەو تۆڕانەوە”.

وتیشی: “ئێمە دژی سەپاندنی قەدەغەکردن و کپ کردنین و بەرەنگاری بوونی لیستی رەش و پەراوێزخستن دەبینەوە”.

سەرۆکی پێشووی ئەمریکا جەختیشی کردەوە، تۆمارکردنی سکاڵا لەسەر ئەو کۆمپانیایانە، وەرچەرخانێکی گەورەیە لە بواری هەوڵدان بۆ چەسپاندنی ئازادی رادەربرین”.

لەسەرەتای ئەمساڵ و دوای ئەوەی لایەنگرانی ترامپ هێرشیان کردە سەر کۆنگرێسی ئەمریکا، هەژمارەکانی ترامپ لە تۆڕە کۆمەڵایەتیەکان راگیران، ئەمە جیا لەوەی زۆر جار بە تایبەتی لە ماوەی بانگەشەی هەڵبژاردنی سەرۆکایەتی ئەمریکادا پۆست و تویتەکانی بە هۆی بڵاوکردنەوەی زانیاری ناڕاست یان پشتڕاستنەکراوە رادەگیران.