قەیس خەزعەلی: فوئاد حسێن پاساو بۆ مانەوەی هێزەکانی ئەمریکا دەهێنێتەوە

SNN                  

ئەمینداری گشتیی عەسائیبی ئەهلی حەق رەخنە لە لێدوانێکی وەزیری دەرەوەی عێراق دەگرێت، لەبارەی پێویستی عێراق بە پشتیوانی ئەمریکا لە شەڕی دژ بە داعش.

قەیس خەزعەلی ئەمینداری گشتیی عەسائیبی ئەهلی حەق رایگەیاند: “قسەکانی فوئاد حسێن وەزیری دەرەوەی عێراق لە بارەی پێویستی هێزە ئەمنییەکانی وڵاتەکە بە هاوکارییەکانی ئەمریکا، جێگەی داخە و مایەی قەبوڵکردن نییە”.

راشیگەیاندوە: “ئەو جۆرە قسانە پاساوهێنانەوەیە بۆ مانەوەی هێزە سەربازییەکانی ئەمریکا لە عێراق”.

رۆژی هەینی فوئاد حسێن لە کۆنگرەیەکی رۆژنامەوانی هاوبەشدا لەگەڵ ئەنتۆنی بلینکن وەزیری دەرەوەی ئەمریکا رایگەیاندبوو: “هێشا داعش چالاکە و مەترسییەکانی بەردەوامن، بۆیە عێراق پێویستی بە هاوکاری و یارمەتی نێودەوڵەتی هەیە”.

باسی لەوەشکردبوو: “تا ئێستاش لە رووی راهێنان و پڕچەککردنەوە هێزە ئەمنییەکانی عێراق پێویستیان بە هاوکاری و پشتیوانییەکانی ئەمریکا هەیە”.