پەیام و دروشمی سەرەکی هاوپەیمانی کوردستان پەسەندکرا
SNN
ئەمڕۆ هاوپەیمانی کوردستان بەسەرۆکایەتی قوباد تاڵەبانی و ئامادەبوونی ئەندامانی لیژنەکە کۆبۆوە بۆ تاوتوێکردنی بارودۆخی ئامادەکارییەکانی بانگەشەی هەڵبژاردنی پەرلەمانی عێراق و چۆنێتی دەستپێکردنی هەڵمەتى بانگەشە.
سەرەتای کۆبوونەوەکە، هەڵسەنگاندن بۆ بڕیار و راسپاردەکانی کۆبوونەوەی پێشووی لیژنەی باڵای هاوپەیمانی کوردستان کرا و بڕیاردرا دەزگا و ئۆرگانەکانی یەکێتی و گۆڕان ئاشنا بکرێن بە راسپاردە و بڕیارەکانی ئەم لیژنەیە بۆ ئەوەی لە هەر بازنەیەکی هەڵبژاردندا ئامادەکاری تەواو بکرێت.
پاش گفتوگۆکردن، کۆبوونەوە پەیام و دروشمی سەرەکی هاوپەیمانی کوردستانی پەسەندکرد و رۆژی سازدانی مەراسیمی ناساندنی کاندیدەکانی دیاری کرد.
هەروەها کۆبوونەوە جەختی کردەوە کە دەبێت بەرنامە و پلانی هاوپەیمانی کوردستان بۆ کۆمەڵانی خەڵکی کوردستان روون بکرێتەوە کە ئامانج لێی بەدەستهێنانی مافەکانیانە و ئەم هاوپەیمانێتیە دەتوانێت ئەو ئەرکە بگرێتە ئەستۆ لەبەغدا و بەیەک دەنگ داوای ئەو مافانە بکات تا لەسایەیدا ژیان و گوزەرانی خەڵك باشتر بكرێت.
