یەک ملیۆن ژەمە ڤاکسین لە چینەوە گەیشتە عێراق

SNN

وه‌زاره‌تی ته‌ندروستی و ژینگه‌ی عێراق گه‌یشتنی چواره‌می كاروانی ڤاكسینی سینۆفارمی چینی راگه‌یاند، کە یەک ملیۆن ژەمە ڤاکسینە وبەرپرسێکی وەزارەتەکەش دەڵێت: گرێبەستی کڕینی 36 ملیۆن ژەمە ڤاکسینیان لەگەڵ پەکین کردووە.

ریاز عه‌بدولئه‌میر حلفی به‌ڕێوه‌به‌ری گشتی فه‌رمانگه‌ی ته‌ندروستیی گشتی لە وەزارەتی تەندروستی و ژینگەی عێراق رایگەیاندوە: وه‌زاره‌تی ته‌ندروستی كاروانێكی نوێی ڤاكسینی سینۆفارمی چینی وه‌رگرتوه‌ كه‌ بڕه‌كه‌ی ملیۆنێك ژه‌مه‌ و كاریگه‌ری باشی له‌سه‌ر به‌رزكردنه‌وه‌ی به‌رگری جه‌سته‌ هه‌یه‌.

باسی لەوەشکردوە، “ئەو بڕە ڤاكسینەی گەیشتوەتە بەغدا، دەست بەدابەشكردنی دەكرێت بەسەر سەرجەم پارێزگاكان و هەرێمی كوردستانیشدا، بۆئەوەی هاوڵاتیان لەرێگەی بنكە تەندروستیەكانەوە بتوانن بەكاری بهێنن و دوربن لەمەترسیەكانی توشبون بە ڤایرۆسی كۆرۆنا”.

لە لایەکی ترەوە عه‌لی به‌له‌داوی، به‌ڕێوه‌به‌ری كۆمپانیای گشتی بۆ به‌بازاڕكردنی ده‌رمان و پێداویستی پزیشكی له‌وه‌زاره‌تی ته‌ندروستیی عێراقڕایگه‌یاندوه‌، ” گرێبه‌ستی دابینكردنی 36 ملیۆن ژه‌م ڤاكسینی كۆرۆنایان له‌گه‌ڵ وڵاتی چین كردوه‌، له‌ماوه‌ی رابردوشدا سێ كاروان ڤاكسینمان به‌ده‌ست گه‌یشتوه‌ كه‌ كۆی گشتی یەک ملیۆن و 750 هەزار ژەمە ڤاکسین بوون”.

به‌گوێره‌ی دواین ئاماری وه‌زاره‌تی ته‌ندروستی و ژینگه‌ی عێراق، تا ئێستا پێنج ملیۆن و 154 هه‌زار و 861 كه‌س ڤاكسینیان وه‌رگرتوه‌.