مەڵبەندی دوو: چەند لایەنێكی شۆڤێنی وەك هاوسۆزیەك بۆ تیرۆرستان، بەیاننامەیان لەدژی پێشمەرگە دەرکردووە

SNN

مەڵبەندی دووی كەركوكی یەكێتیی نیشتمانیی كوردستان لەبارەی پەلامارە تیرۆرستیەكەی شەوی رابردووی سنوری ناحیەی پردێ كە بوە هۆی شەهیدبوونی دوو پێشمەرگە و بریندار بوونی ژمارەیەكی تر راگەیەنراوێكی بڵاوكردەوە و تیایدا رایگەیاندوە: “لەكاتێكدا خوێنی زام و جەستەی بریندارەكانی پێشمەرگەكان تیمار نەكرابوو، چەند لایەنێكی شۆڤێنی وەك هاوسۆزیەك بۆ تیرۆرستان، بەیاننامەیان لەدژی هێزی پێشمەرگەی كوردستان و بڕیارێكی فەرماندەی گشتی هێزە چەكدارەكانی عیراق بڵاوكردۆتەوەو دژی پێكهێنانی هێزی هاوبەشی نێوان پێشمەرگە و سوپای عیراقن”.

ئەوەشی خستوەتەڕوو: “تیرۆرستانی داعش سودیان لەو بۆشاییە وەرگرتوەو بوونەتە مەترسی بۆ سەرو ماڵ و ئاسایشی كەركوك و كەركوكیەكان، بێگومان ئەمەش بەدروستبوون و پێكهێنانی هێزی هاوبەش لەو سنوورانە دۆخی ئەمنی بەهێزتر دەبێت و خەونی تیرۆر و تیرۆرستان و شۆڤێنیەكانیش لەگۆڕ دەنرێت”.

دەقی راگەیەنراوەکە

 
لەكاتێكدا شەوی رابردوو هێزەكانی پێشمەرگەی كوردسان لە بەرزاییەكانی زورگەزراو سەر بەناحیە پردێ كەوتنە بەر هێرشێكی تیرۆرستانی داعش، بەداخەوە دوو پێشمەرگە شەهید بوون و ژمارەیەكیتریش برینداربوون، ئەوەی جێگەی نیگەرانیە كە هێز و لایەنە توركمانی و عەرەبی و عیراقیەكان لەبری ئەوەی پڕۆتستۆی ئەو كارە تیرۆرستیە بكەن،كە بەرگری لەخاك و گەلانی ئەم وڵاتە دەكەن،بەڵام بەداخەوە، لەكاتێكدا كە هێشتا خوێنی زام و جەستەی بریندارەكانی پێشمەرگەكان تیمار نەكرابوو،چەند لایەنێكی شۆڤێنی وەك هاوسۆزیەك بۆ تیرۆرستان،بەیاننامەیان لەدژی هێزی پێشمەرگەی كوردستان و بڕیارێكی فەرماندەی گشتی هێزە چەكدارەكانی عیراق بڵاوكردۆتەوە،رایانگەیاندوە دژی پێكهێنانی هێزی هاوبەشی نێوان پێشمەرگە و سوپای عیراقین…!
رەتكردنەوەی چەمكی (هاوبەشی و هاوئاهەنگی) لەپێناو پاراستنی ئاسایشی سەرو ماڵی هاووڵاتیانی سەرجەم نەتەوەكان خۆی لەخۆیدا دەیسەلمێنێت ئەوجۆرە سیاسەتانە جگە لە ئەجێندایەكی شۆڤێنی و تایەفی هیچ خزمەتێك بەپێكهاتەكانی كەركوك ناگەیەنێت.
بۆیە داواكارین لە فەرماندەی گشتی هێزە چەكدارەكانی عیراق پەلەبكات لەپڕكردنەوەی بۆشایی ئەمنی نێوان هێزی پێشمەرگەی كوردستان و هێزەكانی تری سوپای عیراق،چونكە تیرۆرستانی داعش سودیان لەو بۆشاییە وەرگرتووەو بوونەتە مەترسی بۆ سەرو ماڵ و ئاسایشی كەركوك و كەركوكیەكان،بێگومان ئەمەش بەدروستبون و پێكهێنانی هێزی هاوبەش لەو سنورانە دۆخی ئەمنی بەهێزتر دەبێت و خەونی تیرۆرو تیرۆرستان و شۆڤێنیەكانیش لەگۆڕ دەنرێت.
یەكێتیی نیشتمانیی كوردستان
مەڵبەندی دووی رێكخستنی كەركوك
31/10/2021