وەزارەتی کارەبا: پێدانی کارەبا 10 بۆ 12 کاتژمێر کەمبووەتەوە

SNN

وەزارەتی کارەبای هەرێم رايگەياند: “بەهۆی زيادبوونی خواست لەسەر کارەبا و هاتنی شەپۆلی سەرما و سۆڵە ماوەی پێدانی کاتژمێرەکانی کارەبا لە 12-10 کاتژمێر کەمبووەتەوە”.

وەزارەتی کارەبا لە راگەيەندراوێکدا بڵاويکردەوە: هاووڵاتیانی کوردستان ئاگادار دەکەینەوە کە بە هۆی هەڵکشانی خواست لەسەر کارەبا بۆ 6000 مێگاوات و هاتنی شەپۆلێکی سەرما و سۆلە، ماوەکانی پێدانی کارەبا بۆ 10-12 کاتژمێرێک کەم بووەتەوە.

راشيگەياند: ئەمە لە کاتێکدا ئێستا توانایی بەرهەمهێنانی کارەبا بۆ هاوبەشانی کارەبا 2800 مێگاواتە.

دەشڵێت “وەزارەتی کارەبا کار بۆ گەڕاندنەوەی دوو یەکەی وێستگەی هەڵمیی خەبات دەکات و تا کۆتایی ئەم هەفتەیە 300 مێگاوات کارەبا بۆ ناو تۆڕی نیشتمانی کارەبا دەگەڕێتەوە و تا ئاستێک دۆخی کارەبا باشتر دەبێت”.