وەزارەتێکی هەرێم لەسەر دامەزراندن روونکردنەوە دەدات

SNN

وەزارەتی شارەوانی و گەشتوگوزاری هەرێم سەبارەت بە دامەزراندنی دەرچوویەکی زانکۆ لە وەزارەتەکە ڕایگەیاند: ئەو کەسە لە سێ یەکەمەکانی زانکۆ و پەیمانگەکانی هەرێمەوە و لەسەر ئەو بنەمایە دامەزراوە.   

دەقی روونکردنەوەکە:

ڕوونكردنەوەیەك بۆ ڕای گشتی

سەبارەت بە دەنگۆی دامەرزاندنی دەرچوویەكی زانكۆ لەسەر میلاكی وەزارەتی شارەوانی و گەشتوگوزار بە تایبەتی كە لە سۆشیاڵ میدیادا بڵاوكراوەتەوە، دەمانەوێت ڕوونی بكەینەوە، ئەو بەڕێزە لە سێ یەكەمەكانی زانكۆ و پەیمانگە حوكمییەكانی كوردستانە و ڕیزبەندی ژمارەی (19)یە لەو (25)كەسە و لەسەر داوای خۆی وەزارەتی شارەوانی و گەشتوگوزاری هەڵبژاردووە.

بڕیاری دامەزراندنی هەمیشەیی سێ یەكەمەكانی سەر ئاستی كۆلێژ و بەشەكانی زانكۆ و پەیمانگە حكومییەكان لە دەرچووانی ساڵی خوێندنی 2016-2017 بە گوێرەی حوكمەكانی ماددەی (هەشتەم) لە یاسای ئەنجوومەنی وەزیرانی هەرێمی كوردستان ژمارەی(3)ی ساڵی 1992 هەمواركراو لەسەر پێشنیازی وەزارەتی خوێندنی باڵا و توێژینەوەی زانستی و ئاماژە بە كۆبوونەوەی ئەنجوومەنی وەزیران ژمارەی (71) لە 1/12/2021 دراوە.

ڕاگەیاندنی وەزارەتی شارەوانی و گەشتوگوزار