بە بڕیاری بافڵ جەلال تاڵەبانی باڵەخانەیەك بۆ كەمپەسی خانەقین دروستدەكرێت

SNN

دوابەدوای کۆبوونەوەی ئەم دواییەی بافڵ جەلال تاڵەبانی لەگەڵ نوێنەرانی خوێندکارانی ناڕازی بڕیاردرا باڵەخانەیەک بۆ کەمپەسی خانەقین دروست بکرێت و هەر لەم هەفتەیەدا هەنگاوە سەرەتاییەکان بۆ ئەو مەبەستە دەنرێن و بڕیاریشە لەماوەیەکی کەمدا کارەکانی پرۆژەکە تەواو بکرێن.

نووسینگەی رۆژنامەوانی بافڵ جەلال تاڵەبانی بڵاویکردەوە: “لەمیانی هەوڵەکانی بۆ بەرەوپێشچوونی رەوتی خوێندن و ئاستی زانستیی زانکۆکانی هەرێمی کوردستان و رەخساندنی زەمینەیەکی لەبار بۆ خوێندکاران و گەنجان، بافڵ جەلال تاڵەبانی بڕیاریدا بە دروستکردنی باڵەخانەیەکی مۆدێرن بۆ کەمپەسی خانەقین کە پێکدێت لە هۆڵی خوێندن و تاقیگەی زانستیی پێشکەوتوو. پرۆژەکە بەبڕی 412،500،000 چوار سەد و دوانزە ملیۆن و پێنج سەد هەزار دینار جێبەجێ دەکرێت”.

ئاماژەی بەوەشکردوە: “ئەم بڕیارە دوای دیداری بافڵ جەلال تاڵەبانی ھات لەگەڵ نوێنەری خوێندکارانی ناڕازی و پاش خستنەڕووی ئەو داواکارییە، بەڵێنی بە خوێندکارانی بەشی کۆمپیوتەر و تەکنەلۆژیای زانیاریی خانەقین سەر بە زانکۆی گەرمیان دا و ئەمڕۆ  بڕیارەکە خرایە بواری جێبەجێکردنەوە”.

نوسینگەی رۆژنامەوانی بافڵ جەلال تاڵەبانی ئەوەشی خستوەتەڕوو، کە “كەمپەسی خانەقین/ بەشی كۆمپیتەر و تەكنەلۆژیای زانیاری سەر بەزانکۆی گەرمیان ساڵی 2019 دامەزراوە. کەمپەسەکە تاوەکو ئێستا باڵەخانە و هۆڵ و تاقیگەی گونجاوی نەبووە بۆ خوێندن. بە بڕیاری بافڵ جەلال تاڵەبانی ڕۆژی 4 شەممە تیمەكانی مەكتەبی ئیدارە و دارایی گشتیی یەکێتی دەستبەکار دەبن و کارەکانی پرۆژەکە لەماوەیەکی کەمدا تەواو دەکرێن و دەخرێتە خزمەت خوێندکارانەوە”.