“ئێمە دەمێکە داوای حکومەتی دامەزراوەیی و نیشتیمانی دەکەین، بەڵام گوێمان لێنەگیرا”

SNN-
ئەندامێکی خانەى راپەڕاندنى بزوتنەوەى گۆڕان رایگەیاند، ئەوان دەمێکە داوای حکومەتی دامەزراوەیی و حکومەتی نیشتیمانی دەکەن، بەڵام گوێیان لێنەگیرا و ئێستاش درک بە مەترسییەکانى قۆناغەکە و قەوارەی هەرێم دەکەن.

سەفین مەلا قەرە، ئەندامى خانەى راپەڕاندنى بزوتنەوەى گۆڕان، بە دەنگی ئەمریکای راگەیاندووە”گفتوگۆمان لەگەڵ کردون تا کێشەی نێوانیان چارەسەر بکەن و ئامادەییشمان نیشانداوە بۆ نێوەنگیری و تائێستا دەڵێن کێشەکانمان چارەسەر دەکەین، بەڵام هەنگاوی کرداری نابینین، هەرچەندە بڕیارە کۆببنەوە و پارتی جوڵەی بۆ لای لایەنەکان دەستپێکردوە.”

لەبارەى دۆخى ناوخۆیی بزوتنەوەى گۆڕانەوە، دەشڵێت:” لەناو گۆڕان جیابوونەوە ڕووینەداوە، بەڵام ناڕەزایەتی هەبووە لە مەسەلەی بەشداری کردنمان لە حکومەت، هەندێک پێیانوایە چوونمان بۆ نێو حکومەت هەنگاوی هەڵە بووە و پێویستە بکشێینەوە، ئێستاش دەبێت کۆنفرانس ببەستین، بە هەموو لایەکمانەوە بڕیار بدەین و بەرپرسیارێتی هەڵبگرین، لە حکومەت بکشێینەوە یان بمێنینەوە.”

سەفین مەلا قەرە ئاماژەی بەوەشکردووە:” لە هەر بڕیارێکى ئایندەدا بە بەرپرسیارێتى مامەڵە دەکەن چونکە درک بە مەترسی قۆناغەکە و مەترسییەکانی سەر قەوارەی هەرێم دەکەن.”