ئەمساڵ زۆرترین كرێكاری بیانی لە هەولێر گیانیان لەدەستداوە

SNN-عەلی حەمە سەعید

لەمساڵدا لە هەرێمی كوردستان 12 كرێكاری بیانی لە هەرێمی كوردستان گیانیان لەدەستداوە كە حەوت كرێكاریان لە هەولێر و پێنج كرێكاریشیان لە سلێمانی گیانیان لەدەستداوە، هاوكات لە كۆی ئەو 12 كرێكارە حەوتیان ڕەوانەی وڵاتەكانیان كراونەتەوە و پێنجیشیان لە هەرێمی كوردستان نێژراون.

بەگوێرەی بەدواداچوونەكانی SNN بە پشت بەستن بەئەو ئامارانەی كە لە رێكخراوی كرێكارانی بیانی دەستیكەوتوون ئەوە خراوەتەڕوو، لەدوای سەرهەڵدانی قەیرانی دارایی و هەروەها بڵاوبوونەوەی ڤایرۆسی كۆ‌رۆنا، هێنانی كرێكاری بیانی بۆ هەرێمی كوردستان بە ڕێژەی لە %56 كەمیكردووە، ئەوانەشی كە پێشتر هاتوون بەهۆی دەستكەوتنی ئیش و هەروەها دامەزراندیان لە كۆمپانیا و كەرتی تایبەت ماونەتەوە و خاوەن كاری خۆیانن.

ئاماژەی بەوەشكرد: كاركردنی ئەو كرێكارە بیانیانە بەدوور نییە لە ڕووداوی نەخوازراو و گیان لەدەستدان، بەتایبەت ئەو كرێكارانەی كە كاری مەیدانی دەكەن لەگەڵ كۆمپانیا بازرگانییەكانی بواری دروستكردنی باڵەخانە و یەكە نیشتەجێبوونەكان، هەر لەو چوارچێوەیەشدا لەمساڵدا 12 كرێكاری بیانی لەهەرێمی كوردستان گیانیان لەدەستداوە لەو ژمارەیەش حەوت كرێكاریان لە هەولێر و پێنج كرێكاریشان لە سلێمانی گیانیان لەدەستداوە.

هەر لە بەدواداچوونەكانی SNN ئەوەشهاتووە كە لەكۆی ئەو 12 كرێكارەی كە لەمساڵدا گیانیان لەدەستداوە حەوت كرێكاریان تەرمەكانیان لەڕێگەی باڵوێز و كونوسوڵی وڵاتەكانیان لەهەرێمی كوردستان و عێراق ڕەوانەی وڵاتەكانیان كراونەتەوە و پێنج كرێكاریشیان هەر لە هەرێمی كوردستان بەخاك سپێردراون، هاوكات ڕەوشی كرێكارانی بیانیش لە هەرێمی كوردستان تاڕادەیەك باشە و ئەو مووچەیەی وەریدەگرن گونجاوە لەگەڵ باری دارایی وڵاتەكانیان هاوكات هەندێك جاریش پێشێلكاری بەرامبەر بەمافەكانیان دەكرێت.