SNN زانیاری لە بارەی پشووی ناوەندەکانی خوێندن لە سلێمانی ئاشکرادەکات

SNN-

هەردوو بەڕێوەبەری پەروەردەی رۆژهەڵات و رۆژئاوای سلێمانی جەختلەوەدەکەنەوە تا ئێستا هیچ بڕیارێک نییە بۆ راگرتنی دەوام لە ناو خوێندنگاکانی سەر بەبەڕێوەبەرایەتییەکەیان و دەشڵێن، گەر کەشوهەوا گۆڕانکاری تێدا روویدا ئەو کات پشوو رادەگەیەنین.

بەناز رەمەزان، بەڕێوەبەری پەروەردەی رۆژئاوا بە SNN-ی راگەیاند، تا ئێستا کەشوهەوا لە ناو شاری سلێمانی ئاساییە و بەو جۆرە نییە پێویست بکات پشوو رابگەیەنین، ئێستاش بەردەوام چاودێری کەشوهەوادەکەین تا کاتژمێر  10:00لەسەر خەتین بۆئەوەی ئەگەر پێویست بێت پشوو رابگەیەنین.

هەروەها تریفە محەمەد، بەڕێوەبەری پەروەردەی رۆژهەڵات لە لێدوانێکدا بە SNN-ی راگەیاند، تا ئێستا هیچ بڕیارێک نییە بۆ راگەیاندنی پشوو، چونکە کەشوهەوا لە ناو سەنتەری شاری سلێمانی ئاساییە و هیچ ئاستەنگییەک بۆ هاتووچۆی خوێندکاران دروست نابێت و و لەگەڵ قائیمقامی سلێمانیش لەسەر خەتین گەر پێویست بوو پشوو رادەگەیەنین.

هاوکات لەتیف حسێن، بەڕێوەبەری پەروەردەی شارباژێڕیش لەلێدوانێکدا بۆ SNN وتی: تا ئێستا بڕیاری راگرتنی دەوام و پشوو نەدراوە، چونکە کەشوهەوا ئاساییە و لەگەڵ یەکەی ئیداری سنوورەکەش لەسەر خەتین هەرکات پێویست بوو پشوو رادەگەیەنین

ئەوە لە کاتێکدایە پێشتر زانا رەحمان، قائیمقامی پێنجوێن رایگەیاند، بەهۆی نزمبوونەوەی پلەکانی گەرما و بەردەوامبوونی بارینی بەفر لەسنوری قەزاکەماندا، بەڕاوێژ لەگەڵ بەڕێوەبەرایەتی پەروەردەی پێنجوێن بڕیارماندا سبەینێ پێنجشەممە 5ی کانوونی دووەمی 2023، پشووی فەرمی بێت لەسەرجەم خوێندنگاکانی سنوری هەردوو ناحیەی گەرمک و ناڵپارێز و ناو قەزای پێنجوێن.