بافڵ جەلال تاڵەبانی: خەڵکەکەمان قوربانیی سەرەکی ناکۆکییەکانن

SNN-

سەرۆکی یەکێتی نیشتمانی کوردستان رایگەیاند، دەبێت رێککەوتنێکی یەکجارەکی بکرێت و چارەسەرێکی بنچینەیی بۆ کێشەکان بکرێت، بۆ ئەمەش دەبێت دەستوور خاڵی یەکلاکەرەوە بێت، دەشڵێت:” ئێمە لەگەڵ دواخستنی هەڵبژاردن نین، بەڵام پێویستە یاسای هەڵبژاردن هەموار بکرێتەوە و تۆماری دەنگدەران پاکبکرێتەوە”.

نووسینگەی راگەیاندنی سەرۆکی یەکێتیی نیشتمانی کوردستان بڵاویکردووەتەوە، بافڵ جەلال تاڵەبانی لە بەغدا پێشوازیکرد لە ئەلینا رۆمانۆسکی، باڵیۆزی ئەمریکا لە عیراق و دۆخی سیاسی و ئابووری عیراق گفتوگۆی لەبارەوەکرا و جەخت لە چارەسەرکردنی کێشەکانی نێوان هەولێر و بەغدا کرایەوە.

لە راگەیەبدراوەکەدا هاتووە کە بافڵ جەلال تاڵەبانی ئاماژەی بە هەنگاوەکانی یەکێتیی نیشتمانی کوردستان کرد بۆ کۆتاییهێنان بە ناکۆکییەکانی نێوان هەولێر و بەغدا دەستپێکی قۆناغێکی نوێی سیاسی و رایگەیاند، خەڵکەکەمان قوربانیی سەرەکی ناکۆکییەکانن و پێویستە بەزووترین کات کۆتایی بەو دۆخە نەخوازراوە بهێنرێت و دەبێت رێککەوتنێکی یەکجارەکی بکرێت و چارەسەرێکی بنچینەیی بۆ کێشەکان بکرێت، بۆ ئەمەش دەبێت دەستوور خاڵی یەکلاکەرەوە بێت.

لەبارەی دۆخی هەرێم و ژیانی هاوڵاتییانەوە سەرۆکی یەکێتی نیشتمانی کوردستان بەرچاوڕوونیدایە باڵیۆزی ئەمەریکا و وتی، ئامانجی ئێمە دەستەبەرکردنی ژیانێکی ئارام و سەقامگیرە بۆ خەڵکەکەمان، هەموو هەوڵێکیش لەو پێناوەدا دەدەین و ژیانی خەڵک لەسەروو هەمووشتێکەوەیە.

سەبارەت بە ئەنجامدانی هەڵبژاردنیش لەوادەی خۆیدا بافڵ جەلال تاڵەبانی راشیگەیاند:” ئێمە لەگەڵ دواخستنی هەڵبژاردن نین، بەڵام پێویستە یاسای هەڵبژاردن هەموار بکرێتەوە و تۆماری دەنگدەران پاکبکرێتەوە”