جوتیار عادل: حکومەت هەموو هەوڵێک دەدات بۆ دابەشکردنی مووچەی فەرمانبەران

SNN-

وتەبێژی حکومەتی هەرێمی کوردستان رایگەیاند، هەموو هەوڵێک دەدەن بۆ دابەشکردنی مووچەی فەرمانبەران و هەرکاتێکیش 400 ملیار دینارەکە گەیشت لەگەڵ ئەو داهاتەی هەیە مووچەی پێ دابەشدەکەن.

جوتیار عادل، وتەبێژی حکومەتی هەرێمی کوردستان رایگەیاند، بۆ دابینکردنی مووچە هەموو هەوڵێکمان دەخەینە گەڕ و هەر کاتێکیش بڕی 400 ملیار دینارەکەی بەغدا گەیشتە هەرێمی کوردستان لەگەڵ ئەو داهاتەی ناوخۆیەی کە هەیە تەنیا بۆ مووچەی فەرمانبەران و خانەنشینان و سوودمەندانی تۆڕی کۆمەڵایەتی تەرخاندەکرێت و مووچەی پێ دابەشدەکرێت.

سەبارەت بە زیانەکانی راگرتنی نەوتی هەرێمی کوردستان وتیشی: ئەو پرسە کاریگەری نەرێنی لەسەر داهاتی هەرێمی کوردستان دروستکردووە، بەجۆرێک پێشتر 80%ـ ی مووچە لە داهاتی نەوت دابیندەکرا، بەڵام ئێستا داهاتی نەوت نەماوە، بەڵام ئێمە دەتوانین ئەو دۆخە تێپەڕێنین و دۆخی ئابوری هەرێمی کوردستانیش لەوەی ئێستا هەیە زۆر باشتر دەبێت، بۆ نموونە لە کاتی بڵاوبوونەوەی ڤایرۆسی کۆرۆنا نرخی نەوت بۆ ئاستێکی زۆر دابەزی و حکومەتی هەرێمیش بەردەوام بوو لە دابەشکردنی مووچە.

ئەوە لە کاتێکدا وا لەکۆتایی مانگی چوار نزیک دەبینەوە ئێستا حکومەتی هەرێمی کوردستان نەیتوانیوە مووچەی مانگی سێ دابەشبکات و بۆ مووچەی مانگی چواریش هیچ بڕیارێک نەدراوە کەی دابەشدەکرێت.