بەهای 100 دۆلار گەیشتە 2500 لیرەی تورکی
لیرە و دۆلار
SNN
ئەمڕۆ جارێکی دیکە بەهای دۆلاری ئەمریکی بەرز بوەوە و یەک دۆلار بەرامبەر بە 25 لیرەی تورکی، مامەڵەی پێوە دەکرێت، واتا هەر 100 دۆلارێک بەرامبەر 2500 لیرەی تورکی مامەڵەی پێوە دەکرێت.
دوێنێ پێنجشەممە بەهای دۆلاری ئەمریکی بەرزبوەوە و رۆژەکەی گەیشتە 24.8897 لیرە، ئەمڕۆش جارێکی دیکە بەهای دۆلار بەرزبونەوەی بەخۆوەبینی و بەیانی ئەمڕۆ بەهای دۆلار بەراورد بە دوێنێ بە رێژەی لە سەدا 0.8 بەرز بوەوە و بە 25.0860 مامەڵەی پێوەکرا.
بە بڕوای چاودێران دوای ئەوەی ئاماژە بەوە کرا کە بانکی ناوەندیی ئەمریکا رەنگە لەمساڵدا دو جار رێژەی سو زیاد بکات، خواست لەسەر دۆلار لە بازاڕەکانی جیهان زیادی کرد، لە لایەکی دیکەوە بانکی ناوەندیی تورکیا دوێنێ رایگەیاند، سیاسەتی سوی بە 650 خاڵ زیادکردوە و لە سەدا 8.50 بۆ لەسەدا 15 بەرزکردوەتەوە.
