ئەمڕۆ کۆتا رۆژی گەرما دەبێت و ماڵئاوایمان لێ دەکات

SNN

بەڕێوەبەرایەتی کەشناسی ھەرێم رایگەیاند؛ ئەمڕۆ کۆتا رۆژ دەبێت کە پلەکانی گەرما تێیدا بەرز بێت و لە سبەینێوە پلەکانی گەرما روو لە دابەزین دەکەن.

رۆژی پێنجشەممە بەڕێوەبەرایەتی کەشناسی ھەرێم لە راگەیاندراوێکدا باسی لەوەکردووە، شەپۆلی گەرما لە ھەرێم و ناوچەکە کۆتایی ھاتووە و لە سبەینێوە پلەکانی گەرما شەش بۆ ھەشت پلە دادەبەزن.

ئاماژەی بەوەشکردووە، سبەی ھەینی زیاتر ھەست بە دابەزینی پلەکانی گەرما دەکرێت و لە سەرەتای ھەفتەی داھاتووش زیاتر دادەبەزێت.

لەبارەی ھاتنی شەپۆلی گەرماوە بەڕێوەبەرایەتی کەشناسی دەڵێت، تا ئێستا ھیچ شەپۆلێکی گەرما لە مانگی نۆدا تۆمار نەکراوە و شەپۆلەکانی گەرما بۆ ئەمساڵ کۆتایی ھاتن.