لە بەشە خۆراکی ئەم مانگەدا دوو خۆراک زیاد دەکرێت

SNN

بەڕێوەبەری گشتیی بازرگانی هەرێم رایگەیاندووە، لە هەفتەی داهاتوو دەست بە دابەشکردنی بەشە خۆراکی مانگی هەشت دەکرێت، دەڵێت: “ئەم مانگە نیسک و نۆکی تێدا دەبێت”.

نەوزاد شێخ کامیل بەڕێوەبەری گشتیی بازرگانی هەرێم رایگەیاندووە، بڕیارە هەفتەی داهاتوو بەشە خۆراکی مانگی هەشت دابەشبکرێت، پێویستە بریکارەکانی خۆراکیش ئامادەکاریی بکەن.

سەبارەت بە لابردنی فاسۆلیا لە بەشە خۆراکی مانگی ئابدا ئەو بەڕێوەبەرە وتوویەتی: “فاسۆلیا خۆراکێکە زوو تێکدەچێت بەتایبەت لە کاتی هاوردەکردنیدا لە بەندەرە ئاوییەکان تەڕ دەبێت و خراپ دەبێت،هەر بۆیە لە شوێنی فاسۆلیا نیسک و نۆک  دابەش دەکرێت”.

هەندێک لە هاوڵاتیان گلەیی لە خراپبوونی چەند خۆراکێک دەکەن کە لە بریکارەکان وەریدەگرن، نەوزاد کامیل لەوبارەیەوە ئاشکرایکرد، هەر بەشە خۆراکێک کە وەریدەگرن ئەگەر لە ماڵەوە پێیان زانی خراپ بووە بیگەڕێننەوە بۆ بریکارەکە، کە ئەویش پێویستە بۆیان بگۆڕێت.