سزای ونبوونی کارتی نیشتمانی دیاریکرا
كارتى نیشتمانیی عێراق | فۆتۆ: حكومه‌تى عێراق
SNN
بەڕێوەبەرایەتی گشتیی رەگەزنامە و باری شارستانی سلێمانی رایگەیاند، ئەو کەسانەی کارتی نیشتمانی ون دەکەن، سزا دەدرێن، بە جۆرێک سزاکەی لە 25 هه‌زار دینارەوە دەستپێدەکات تاوه‌كو 100 هه‌زار دینار.
ئه‌مڕۆ شه‌ممه 2ى ئه‌یلول، لە راگەیەنراوێكدا بەڕێوەبەرایەتی رەگەزنامە و باری شارستانی سلێمانی ئاشكراى كردووه، “ئەو هاووڵاتییەی کارتی نیشتمانی ون دەکات دەبێت سەرەتا مامەڵەی ونبوونی بۆ بکات، بۆ ئەوەش سەردانی کەرتی کەرتی پۆلیسی بەشی ونبووەکان بکات کە تەنیشت بیناى مەحکەمەی کۆنى سلێمانیه”.
له به‌شێكى ترى راگه‌یه‌نراوه‌كه‌دا بەڕێوەبەرایەتی گشتیی رەگەزنامە و باری شارستانی سلێمانی باسى ورده‌كارى رێوشوێنه‌كانیشى كردووه كه تێیدا هاتووه، “لە دوای سەردانکردنی کەرتی پۆلیس لەوێ نووسراوی بۆ دەکرێت و لەگەڵ خۆیدا دەیهێنێت بۆ بەڕێوەبەرایەتی رەگەزنامە و باری شارستانی سلێمانی، لەگەڵئەوەشدا پێویست ناکات دووبارە فۆرمی کارتی نیشتمانی پڕبکاتەوە”.
سەبارەت بە سزای ونبوونی کارتی نیشتمانی بەڕێوەبەرایەتی رەگەزنامە ئه‌وه‌ى خستووه‌ته‌ڕوو، “جۆری غەرامەکە ئەگەر بۆ یەمەکجار ونبوونێت ئەوا بڕەکەی 25 هەزار دینارە، بۆ دووەم جار ونبووبێت بڕەکەی 50 هەزار دینارە، بۆ سێیەم جار بڕەکەی 100 هەزار دینارە”.
