“هەناردەی نەوتی عێراق بۆ ئەمریکا لە  نیوەی ئەمساڵدا %33 زیادیکردووە”

SNN

نوسینگەی راگەیاندنی وزەی ئەمریکا رایگەیاند، لە ماوەی شەش مانگی یەکەمی  2023دا نزیکەی 65 ملیۆن بەرمیل نەوتی هەناردەی ئەمریکا کردووە، رێژەکەی بەراورد بە هەمان ماوەی ساڵی رابردوو نزیکەی %33 زیادیکردووە.

ئەمڕۆ پێنج شەممە 7ی ئەیلول نوسینگەی راگەیاندنی وزەی ئەمریکا راگەیەنراوێکیان بڵاوکردووەتەوە و تیایدا هاتووە، هاوردەی نەوتی عێراق بۆ وڵاتەکەی، لە مانگی کانوونی دووەمی ئەمساڵدا تا کۆتایی مانگی حوزەیران گەیشتووەتە 64 ملیۆن و737 هەزار بەرمیل، بەمەش رێژەکەی زیاتر لە %33.5 بووە بە بەراورد بەساڵی رابردوو لە هەمان ماوەدا، بە جۆرێک پار ساڵ 2022 لە هەمان ماوەدا 48 ملیۆن و459 هەزار بەرمیل هەناردەی ئەمریکا کراوە.

لە بەشێکی تری راگەیەنراوەکەدا ئەوە خراوەتە ڕوو، بەرزترین ڕێژەی ھەناردەکردنی نەوت بۆ ئەمریکا لە ماوەی شەش مانگی رابردوودا لە مانگی شوباتدا بووە کە گەیشتووەتە 12 ملیۆن و 168 ھەزار بەرمیل نەوت، کەمترین ڕێژەی ھەناردەکردنی نەوتیش لە مانگی حوزەیراندا بووە کە گەیشتووەتە نۆ ملیۆن و 330 ھەزار بەرمیل نەوت.

جێگەی ئاماژەیە، عێراق ساڵانە نزیکەی %10ی ھەناردەی نەوتی خۆی بۆ ئەمریکا ھەناردە دەکات، بە یەکێک لەو 10 وڵاتەش ھەژماردەکرێت کە نەوت ھەناردەی ئەمریکا دەکەن.