راوێژکارێکی سودانی وەڵامی مەسرور بارزانی دەداتەوە

SNN-

راوێژکارێکی سەرۆکوەزیرانی عێراق وەڵامی مەسرور بارزانی دەداتەوە و دەڵێت:”حکومەت پابەندە بە جێبەجێکردنی لێکتێگەیشتنەکان لەگەڵ ھەرێمی کوردستان بە مەرجێک لە چوارچێوەی دەستوردابن”.

شەوی ڕابردوو مەسرور بارزانی، سەرۆکی حکومەتی ھەرێمی کوردستان، لە تۆڕی کۆمەڵایەتی ئێکس پەیامێکی بڵاوکردەوە و رایگەیاند، نەناردنی شایستە داراییەکانی ھەرێمی کوردستان لەلایەن عێراقەوە زیان بە ھاووڵاتیانیان دەگەیەنێت و متمانە کەمدەکاتەوە و پێشێلکردنی دەستورو رێکەوتنەکانیشە.

فادی شەمەری، راوێژکاری سەرۆکوەزیرانی عێراق لە وەڵامی ئەو پەیامەدا بە ئاژانسی ھەواڵی عێراقییەی راگەیاند، لە ژێر سایەی دەستوردا رێککەوتن و لێکتێگەیشتنەکان بەڕێوەدەبرێن و ھیچ شتێک لە سەرووی دەستورەوە نییە.

دەشڵێت:” حکومەت کۆمەڵێک دۆسییەی ئاڵۆزی لەگەڵ ھەرێمی کوردستان بۆماوەتەوەو پابەندبووە بە ئەتەکێتی جێبەجێکردنی لێکتێگەیشتنەکان بە ھەموو خۆشەویستی و داناییەک، ھێشتا نیازی باش ھەیە بەمەرجێک حکومەتی ھەرێم پابەندی بە دەستور و بنەماکانی رێزگرتن و زمانی نەرم و شەفافیەت بێت”.

سەرەڕای ئەوەی بودجەی عێراق پەسەندکراوە و پشکی هەرێمی کوردستانیشی تێدا دیاریکراوە، بەڵام تا ئێستا جێبەجێ نەکراوە و پشکی هەرێمی کوردستان نەنێردراوە.