حکومەتی هەرێم پێشنیازێکی بەغدا بۆ گواستنەوەی راژەی مووچەخۆران رەتدەکاتەوە

SNN

ئەندامێکی لیژنەی دارایی پەرلەمانی عێراق ئاشکرای دەکات، حکومەتی هەرێمی کوردستان پێشنیازی بەغدای بۆ گواستنەوەی راژەی فەرمانبەرانی هەرێم بۆ سەر حکومەتی عێراق رەتکردووەتەوە.

ئەمڕۆ یەکشەمە 10ی ئەیلول موعین کازمی، ئەندامی لیژنەی دارایی پەرلەمانی عێراق رایگەیاند: “ئەگەر حکومەتی هەرێم رەزامەندی دەرببڕێت بۆ گواستنەوەی راژەی مووچەخۆران بۆ سەر وەزارەتی دارایی عێراق، ئەوکات هەموو شتێک باش دەبێت و مانگانە مووچەکانیان پێدەدرێت.”

بە وتەی موعین کازمی: “حکومەتی هەرێمی کوردستان لە ماوەی رابردوودا مەرجی ئەوەبووە کە پشکی 12.67٪ی لە کۆی بودجەی عێراق وەربگرێت و خۆیشی بەرپرسیار دەبێت لە پێدانی مووچەی فەرمانبەرانی.”

ئەوەش لە کاتێکدایە، تاوەکو ئەمڕۆ 10ـی ئەیلولی 2023، مووچەی مانگەکانی ئاب و تەمموزی فەرمانبەرانی هەرێمی کوردستان دابەشنەکراوە و هیچ وادەیەکیش بۆ دابەشکردنی مووچە دیاری نەکراوە.