ئه‌مریكا هێزێكى خۆى له‌نێو فڕۆكه‌خانه‌ى نێوده‌وڵه‌تى به‌غدا جێگیر ده‌كات
باڵیۆزى ئه‌مریكا له عێراق له مه‌راسیمى كردنه‌وه‌ى یه‌كه‌ى چاودێریی باریی ئاسمانى | فۆتۆ: باڵیۆزخانه‌ى ئه‌مریكا
SNN
یه‌كه‌ى چاودێرى باریی ئاسمانى له‌نێو فڕۆكه‌خانه‌ى نێوده‌وڵه‌تى به‌غدا كرایه‌وه كه ویلایه‌ته یه‌كگرتووه‌كانى ئه‌مریكا سه‌رپه‌رشتى ده‌كات و باڵیۆزى ئه‌و وڵاته‌ش له عێراق ده‌ڵێت: “یه‌كه‌كه ده‌رگایه‌كى نوێ ده‌كاته‌وه به‌ڕووى به‌هێزبوونى په‌یوه‌ندییه بارزرگانیه‌كانى عێراق و جیهانى ده‌ره‌وه”.
به‌پێى زانیارییه‌كان، “یه‌كه‌ى چاودێرى باریی ئاسمانى پێكهاتووه له یه‌كه‌یه‌كى تایبه‌تى سه‌ربازى و ته‌كنیكى كه چاودێرى سه‌رجه‌م جموجۆڵه بازرگانیه‌كانى نێو فڕۆكه‌خانه‌ى نێوده‌وڵه‌تى به‌غدا ده‌كه‌ن به‌مه‌به‌ستى رێگه‌گرتن له بازرگانیكردنى نایاسایی به سه‌رجه‌م جۆره‌كانیه‌وه له‌نێو فڕۆكه‌خانه‌كه. یه‌كه‌كه له‌لایه‌ن ویلایه‌ته یه‌كگرتووه‌كانى ئه‌مریكاوه سه‌رپه‌رشتى ده‌كرێت و به هاوكارى حكومه‌تى ناوه‌ندى عێراق كاره‌كانى به‌ڕێوه‌ده‌بات”.
دوێنێ دووشه‌ممه یه‌كه‌كه له مه‌راسمێكدا به ئاماده‌بوونى قاسم ئه‌عره‌جى، راوێژكارى ئاسایشى نه‌ته‌وه‌یی عێراق و ئه‌لینا رۆمه‌ناوسكى، باڵیۆزى ئه‌مریكا له عێراق كرایه‌وه.
له مه‌راسیمى كردنه‌وه‌كه‌یدا باڵیۆزى ئه‌مریكا له عێراق وتارێكى پێشكه‌شكرد و وتى: “كردنه‌وه‌ى ئه‌م یه‌كه‌یه هه‌نگاوێكى زۆر گرنگه به ئاراسته‌ى رێگه گرتن له بازرگانى نا یاسایی له‌نێو فڕۆكه‌خانه‌ى نێوده‌وڵه‌تى به‌غدا و ده‌رگایه‌كى گرنگیش به‌ڕووى عێراقدا ده‌كاته‌وه بۆ دنیاى ده‌ره‌وه”.
له به‌شێكى ترى قسه‌كانیدا باڵیۆنى ئه‌مریكا باسى له‌وه‌شكرد، “كردنه‌وه‌ى ئه‌م یه‌كه‌یه به‌شێكه له پڕۆگرامى پشكنین و كۆنترۆڵى هاورده‌یی هه‌رێمى كه له‌لایه‌ن وه‌زاره‌تى ده‌ره‌وه‌ى ئه‌مریكاوه پاره‌ى بۆ ته‌رخانده‌كرێت”.
ئه‌لینا رۆمه‌ناوسكى ئاماژه‌ى به‌وه‌شكرد، “پاڵپشتى هاوبه‌شه عێراقییه‌كانمان ده‌كه‌ین له هه‌وڵه‌كانیاندا بۆ كۆنترۆڵكردنى ده‌روازه سنوورییه‌كان”.
