لێدوانی پارێزگاری سلێمانی لەبارەی دەوامى فەرمانگەکانەوە

هەوراز ئەحمەد-SNN

پارێزگارى سلێمانى ڕایدەگەنێت “لە ڕۆژى یەکشەمەوە بەپێى ئەو بەرنامەیەى دانراوە دەوام لە فەرمانگەکان دەستپێدەکات و هیچ بڕیارێک نییە لەبارەى ڕاگرتنى دەوامەوە”.

د. هەڤاڵ ئەبوبەکر پارێزگارى سلێمانى بە SNNی ڕاگەیاند “دۆخى سلێمانى لەڕووى کۆرۆناوە لەژێر کۆنترۆڵدایە، بەڵام داوا لە هاوڵاتیان دەکەین بۆ ئەوەى دۆخێکى نەخوازراو ڕوو نەدات، خۆیان بپارێزن”.

وتیشى: “بەپێى ئەو بەرنامانەى کە پێش جەژنى ڕەمەزان کاریان لەسەرى کردووە بڕیارە ڕۆژى یەکشەممە لە ژێر ڕێنماییە تەندروستییەکاندا دەوام لە فەرمانگەکانى سنورى پارێزگاى سلێمانى دەستپێبکاتەوە، تاوەکو ئێستا هیچ بڕیارێکمان بە دەست نەگەشتووە لەبارەى ڕاگرتنى دەوامى فەرمانگەکانەوە”.

لە رۆژانی یەکشەممە تا چوارشەممە دەبێت دەوام لە کاتژمێر ۸:۳٠ خولەکی بەیانی بۆ کاتژمێر 1ی دوانیوەڕۆ بێت، دەوامی فەرمانبەران بەشێوەی یەک لەسەر سێ دەبێت.