ئەمساڵ جگە لە هەنار چەند بەروبوومێكی دیكە هەناردەی دەرەوە دەكرێن

SNN-عەلی حەمە سەعید

وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم ئاماژە بەوەدەكات بۆ ئەمساڵ جگە لە بەرهەمی هەنار ئامادەكاری كراوە كە بەرهەمەكانی سێو ترێ‌ و هەنگوێنی جوتیارانی هەرێمی كوردستان هەناردەی دەرەوە بكرێت، بۆ ئەومەبەستەش سەدان جوتیار ڕاهێنانیان پێكراوە بۆ زیادكردنی بەرهەمەكانیان و هەناردەكردنی بۆ وڵاتانی دەرەوە.

هیوا عەلی، وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم بە SNNی ڕاگەیاند: بەمەبەستی زیاتر گرنگیدان بە بەرهەمی ناوخۆیی جوتیاران و هەروەها باشتركردنی كوالیتی بەرهەمی ناوخۆیی و هەناردەكردنی بۆ وڵاتانی دەرەوە، بەگوێرەی پلانێكی تایبەت كاری ڕاهێنانی هەزار جووتیاری ناوچە جیا جیاكانمان لەسەر بەرهەمهێنانی چەندین بەرهەمی كشتوكاڵی ئەنجامداوە و ڕاهێنانەكەش ئەنجامی باشی هەبووە لەسەرچۆنیەتیی بەرهەمهێنانی میوەو بەرهەمی كشتوكاڵی.

ئاماژەی بەوەشكرد، بۆ ئەمساڵ جگە لەبەرهەمی هەنار كە هەناردەی دەرەوە دەكرێت، ئامادەكاری كراوە كە بەرهەمی سێو ترێ‌ هەنگوێن ی جوتیارانی ناوچە جیاوازەكانی هەرێم ڕەوانەی دەرەوە بكرێت، ئەوەش دوای ئەوەی كە ساڵی ڕابردوو بەفەرمی هەناری هەرێمی كوردستان ڕەوانەی چەند وڵاتێك كرا و بوو بە بڕاند، ئەمساڵ پلان دانرا كە چەند میوەیەكی دیكە بكرێنە بڕاند و بابەتەكە فراوانتر بكرێت و میوەی دیكەش هەناردەی دەرەوە بكرێن.

وتەبێژەكەی وەزارەتی كشتوكاڵ ئەوەشی خستەڕوو، لە قۆناغی یەكەمی وەرگرتن و هەناردەكردنی بەرهەمی جوتیاران بەجۆرێك دەبێت كە بەرهەمی ئەو جوتیارانە هەناردەدەكرێت كە ڕاهێنانیان پێكراوە پاشان بەچەند قۆناغێكی دیكەش جوتیارانی دیكەی ناوچە جیاوازەكان بەهەمان شێوە ڕاهێنانیان پێدەكرێت بۆ ئەوەی بەرهەمەكانیان زیاد بكەن.