کاندیدانی یەكێتی كاردەكەن بۆ جێبەجێكردنی ماددەی 140 كەمافی سەرجەم پێكهاتەكانی تێدا پارێزراوە
SNN-عەلی حەمەسەعید
كاندیدێكی لیستی هاوپەیمانی كەركوك هێز و ئیرادەمانە ئاماژە بەوەدەكات كەركوك شارێكی كوردستانییە و هیچ كەسێك مافی ئەوەی نییە كورد لەوشارە دەربكات هەموو هەوڵیكی تەعریب و ڕاگواستن لە پارێزگای كەركوك رەتدەكەینەوە و بە یاسا و دەستوور رووبەڕووی هەموو ئەو هەوڵانە دەبینەوە.
ئازاد شەریف، كاندیدی ژمارە 15ی یەكێتیی نیشتمانیی كوردستان لە هاوپەیمانی كەركوك هێزوئیرادەمانە بە ژمارە 142 بە SNNی راگەیاند: هەموو هەوڵیكی تەعریب و تەرحیل لە پارێزگای كەركوك رەتدەكەینەوە و بە یاسا و دەستوور رووبەڕووی هەموو ئەو هەوڵانە دەبینەوە كە پشتیوانی لە پێشێلكردنی یاسا و بڕیاری تاكڕەوی دەكەن، چونكە كەركوك شارێكی كوردستانییە و هیچ كەسێك مافی ئەوەی نییە كورد لەوشارە دەربكات و ئەو كوردانەی گەڕاونەتەوە شارەكە مافی خۆیانە لە شوێنی نیشتەجێبوونی باو و باپیرانیان درێژە بە ژیان بدەن.
ئاماژەی بەوەشكرد، ماددەی 140 ماددەیەكی دەستوورییە و دەبێت بۆ ناوچە جێناكۆكەكان پشتی پێببەستین و بەپێی ماددەكە پۆلیسی ناوخۆیی ئارامی ناو پارێزگاكە دەپارێزێت و هیچ هێزێكی دیكەی سەربازی بۆی نییە بێتە ناو پارێزگای كەركوك، ئەمەش لەپێناو ئەوەی هیچ هێزێك بۆی نەبێت دەستدرێژی بكاتە سەر پێكهاتەكان
ئەو كاندیدەی لیستی هاوپەیمانی كەركوك هێز و ئیرادەمانە ئەوەشی خستەڕوو، هەرهەوڵیك لە دەرەوەی یاسا بەتایبەت ماددەی 140 بێت وەك كاندیدانی یەكێتی لە كەركوك رەتیدەكەیەنەوە و ئەو كوردانەشی گەڕاونەتەوە سەر ماڵوحاڵی خۆیان، ئەو كوردانەن كە پێشتر لەلایەن رژێمی بەعسەوە ڕاگوێزراون پاشان لەدوای روخانی رژێم گەڕاونەتەوە سەر ماڵوحاڵی خۆیان.
