سەرەڕای بەرزبوونەوەی ئامارەکانی کۆرۆنا شوێنە گەشتیارییەکانی هەرێم قەرەباڵغن

SNN-عەلی حەمە سەعید

بەڕێوەبەری گەشتوگوزاری هەڵەبجە ئاماژە بەوەدەكات لە ئێستادا هاتنی گەشتیاران بۆ ناوچە گەشتیارییەكانی سنووری پارێزگای هەڵەبجە دەستپێكردوەتەوە و چاودێرییەكی وردی گەشتیارانیش دەكەن.

وەهاب ئەمین، بەڕێوەبەری گەشتوگوزاری هەڵەبجە ئەمڕۆ هەینی 29ی ئایاری 2020 بە SNN ی راگەیاند “ئەو ئامادەكارییەی كە ئەنجاممان دابوو بۆ پێشووازیكردن لە گەشتیاران لە ڕۆژانی جەژندا نەمانتوانی وەك خۆی جێبەجێی بكەین، ئەوەش بەهۆی سەپاندنی قەدەغەی هاتوچۆ لەلایەن وەزارەتی ناوخۆوە، بەڵام لە ئێستادا كە ئەو قەدەغەیە كۆتایی پێهاتووە و تەنها قەدەغەی نێوان پارێزگاكان درێژكراوەتەوە، هاتنی گەشتیارانی ناوخۆیی بۆ ناوچە گەشتیارییەكانی سنووری پارێزگای هەڵەبجە دەستپێكردووەتەوە.

ئاماژەی بەوەشكرد، لیژنەكانمان بە بەردەوامی سەردانی شوێنە گەشتیارییەكانی سنووری پارێزگای هەڵەبجە دەكەن و لە نزیكەوە لە دۆخی گەشتیاران دەكۆڵینەوە، هاوكات بە خاوەن كەپر و كەبابخانە و چێشتخانەكانیشمان ڕاگەیاندووە كە دەبێت بە تەواوەتی پابەندی ڕێنماییەكانی دەستەی گشتی گەشتوگوزار و وەزارەتی تەندروستی ببن لەبارەی خۆپارێزی لە مەترسییەكانی بڵاوبوونەوەی ڤایرۆسی كۆرۆنا.

بەڕێوەبەری گەشتوگوزاری هەڵەبجە ئەوەشی ئاشكراكرد، لە ساڵی ڕابردوو بە تەنها لە جەژنی نەورۆزدا 60 هەزار گەشتیار و لە سێ‌ ڕۆژی جەژنیشدا زیاد لە 40 هەزار گەشتیار سەردانی شوێنە گەشتیارییەكانی ئەم سنورەیانكردووە، بەڵام ئەمساڵ بەهۆی قەدەغەی هاتوچۆ و بڵاوبوونەوەی ڤایرۆسی كۆرۆنا هاتنی گەشتیاران بۆ سنورەكەمان بۆ لە %سفر دابەزیوە، ئەمەش بووەتەهۆی گەیاندنی زیانێكی زۆر بەكەرتی گەشتیاری و خاوەن باخ و كەپەرە گەشتیارییەكان، بۆیە داوامان لە لایەنە پەیوەندیدارەكان كردووە لە باجی سەر ئەو شوێنە گەشتیاریانە خۆشببن كە مۆڵەتی یاساییان هەیە.