په‌یوه‌ندییه‌كانى یه‌كێتى و پارتى پێده‌نێنه قۆناغێكى نوێوه
لۆگۆى یه‌كێتیی نیشتمانیی كوردستان و پارتى دیموكراتى كوردستان | فۆتۆ: SNN
SNN
جێگرى یه‌كه‌مى سه‌رۆكى پارتى دیموكراتى كوردستان ئاشكرایده‌كات، له ماوه‌ى رابردوودا كۆبوونه‌وه‌ى چوارقۆڵى له‌نێوان سه‌رۆكى یه‌كێتى، جێگرانى سه‌رۆكى پارتى و قوباد تاڵه‌بانى، ئه‌ندامى مه‌كته‌بى سیاسى یه‌كێتى به‌ڕێوه‌چووه و ده‌شڵێت: “ئه‌ركى سه‌رشانى پارتى و یه‌كێتیيه كه به پله‌ى یه‌ك بگه‌نه لێكتێگه‌یشتنى هاوبه‌ش”.
نێچیرڤان بارزانى، سه‌رۆكى هه‌رێمى كوردستان و جێگرى یه‌كه‌مى سه‌رۆكى پارتى دیموكراتى كوردستان ئه‌مڕۆ دووشه‌ممه 20ى تشرینى دووه‌م، له‌میانى وتارێكدا كه له كۆڕبه‌ندى ئاشتى و ئاسایشى رۆژهه‌ڵاتى ناوه‌ڕاست له زانكۆى ئه‌مریكى كوردستان له دهۆك پێشكه‌شیكرد رایگه‌یاند، “له ماوه‌ى رابردوو من و كاك بافڵ و كاك قوباد و كاك مه‌سرور و كاك هۆشیار زێبارى كۆبوونه‌وه‌مان ئه‌نجامداوه، به‌هیواین ئه‌م كۆبوونه‌وانه له داهاتووشدا درێژه‌یان هه‌بێت”.
وتیشى: “ئه‌ركى سه‌رشانى پارتى دیموكراتى كوردستان و یه‌كێتیى نیشتمانیى كوردستانه كه به پله‌ى یه‌كه‌م بگه‌نه لێكتێگه‌یشتنى هاوبه‌ش و كێشه و ناكۆكیيه‌كان چاره‌سه‌ر بكه‌ن”.
جێگرى یه‌كه‌مى سه‌رۆكى پارتى دیموكراتى كوردستان جه‌ختى له‌سه‌ر ئه‌وه‌شكرده‌وه، “كۆبوونه‌وه‌كانى رابردووى نێوان یه‌كێتى و پارتى زۆر باش بوون و پێویسته به‌رده‌وامبن. هیچ كێشه‌یه‌ك هێنده ئاڵۆز نییه كه چاره‌سه‌ر نه‌كرێت”.
له به‌شێكى ترى قسه‌كانیدا، نێچیرڤان بارزانى ئاڵنگارییه‌كانى به “مه‌ترسیدار” ناوبرد و وتیشى: “مه‌ترسى و ئاڵنگارییه سیاسیيه‌كانى ئێستا زۆر له كێشه‌كان گه‌وره‌ترن و تاكه رێگه‌ى به‌ره‌نگاربوونه‌وه‌یان بریتیيه له لێكتێگه‌یشتنى سیاسى”.
له كۆتایی وتاره‌كه‌یدا جێگرى یه‌كه‌مى سه‌رۆكى پارتى دیموكراتى كوردستان ئه‌وه‌شى خسته‌ڕوو، “خه‌ڵكى هه‌رێمى كوردستان چاویان له‌وه‌یه كه هه‌مووان یه‌كڕیز و ته‌بابن، چونكه ئه‌وه تاكه رێگه‌ى پاراستنى ئه‌و ده‌ستكه‌وتانه‌یه كه له ماوه‌ى رابردوودا به‌ده‌ستهاتوون”.
