حکومەتی هەرێم لەسەر مووچە و دۆخی کارەبا و توندوتیژی دژی ژنان کۆدەبێتەوە

SNN-

فەرمانگەی میدیای و زانیاری حکومەتی هەرێمی کوردستان بڵاویکردووەتەوە، کە ئەمڕۆ چوارشەممە 6 ی کانوونی یەکەمی 2023، ئەنجوومەنی وەزیرانی حکومەتی هەرێمی کوردستان بەسەرپەرشتی مەسرور بارزانی، سەرۆکوەزیرانی هەرێمی کوردستان و ئامادەبوونی قوباد تاڵەبانی، جێگری سەرۆکوەزیران، کۆبوونەوەی ئاسایی خۆی ئەنجام دەدات و تیایدا چەند بابەتێک تاوتوێ دەکات.

فەرمانگەکە بەرنامەی کاری کۆبوونەوەکەی ئەمڕۆ چوارشەممەی بڵاویکردووەتەوە و دەڵێت، کە بڕگەی یەکەمی کۆبوونەوەکە تایبەت دەبێت بە گفتوگۆ کردن لە بارەی دوا پێشهاتی بەشە بودجە و مووچەی هەرێمی کوردستان، لە میانەی دوا سەردانی شاندی دانوستانکاری هەرێمی کوردستان بۆ بەغدا.

لە بڕگەی دووەمی کۆبوونەوەکەدا راپۆرتی جێگری سەرۆکوەزیران پشتبەست بە بڕیاری ئەنجومەنی وەزیران تایبەت بە راسپاردنی جێگری سەرۆکوەزیران بۆ سەرپەرشتی کۆبوونەوەی لایەنە پەیوەندیدارەکان تایبەت بە پرسی زیادبوونی ژمارەی حاڵەتەکانی توندوتیژی دژی ئافرەتان و خستەڕووی راسپاردە و چارەسەرەکان.

فەرمانگەی میدیا و زانیاری دەشڵێت:”لە بڕگەی کۆتایی کۆبوونەوەکەدا راپۆرتێک سەبارەت بە بارودۆخی کارەبا لە هەرێمی کوردستان دەخرێتەڕوو”.