عەبدولواحید محەمەد” حكومەتی هەرێم و وەزارەتی پەروەردە ئامادەنین هیچ داواكارییەكی مامۆستایان جێبەجێبكەن”
SNN-عەلی حەمە سەعید
سەرۆكی خولی یەكێتی مامۆستایانی كوردستان ئاماژە بەوەدەكات، مەترسی جدی لەسەر ڕەوشی پەروەردە لە هەرێمی كوردستاندا دروستبووە و ئەو ماوە زۆرەی كە بایكۆتی هۆڵەكانی خوێندن كراوە بەهیچ قەرەبوو ناكرێتەوە، جەختدەكاتەوە كە حكومەتی هەرێم و وەزارەتی پەروەردە ئامادەنین لەگەڵ مامۆستایان كۆببنەوە و هیچ یەكێك لە داواكارییەكانی مامۆستایان جێبەجێ بكەن كە هەندێكیان لە دەستەڵاتی حكومەتی هەرێمە.
عەبدولواحید محەمەد، سەرۆكی خولی یەكێتی مامۆستایانی كوردستان بە SNNی ڕاگەیاند: دۆخی پەروەردە و فێركردن لە هەرێمی كوردستان بە قۆناغێكی سەخت و دژواردا تێدەپەڕێت و هیچ ئاسۆیەك نییە بۆ چارەسەركردنی كێشە و گرفتەكانی مامۆستایان و فەرمانبەرانی هەرێم، ئەو ماوە زۆرەشی كە لە پرۆسەی خوێندن فەوتاوە بەهیچ جۆرێك ناتواندرێت قەرەبوو بكرێتەوە بەتایبەت ئێستا نزیك بووینەتەوە لە تەواوكردنی وەرزێكی خوێندن.
ئاماژەی بەوەشكرد، گرفتەكە لەوەدایە حكومەتی هەرێم و وەزارەتی پەروەردە ئامادە نین لەگەڵ مامۆستایانی ناڕازی كۆببنەوە و گوێ لە داواكارییەكانیان بگرن، ڕاستە كێشە و گرفت لەنێوان حكومەتی هەرێم و بەغدا هەیە لەبارەی بودجە و مووچەی فەرمانبەران، بەڵام هەندێك لە داواكاری مامۆستایان پەیوەندی بە حكومەتی هەرێمەوە هەیە و دەتوانێت جێبەجێیان بكات بە نمونە پلە بەرزكردنەوەی مامۆستایان و دامەزراندنی مامۆستایانی وانەبێژ، ئەگەریش لەم قۆناغەدا شایستە داراییەكانیان بۆ خەرج نەكرێت پێناچێت گرفتێكی ئەوتۆ دروست بكات، بەڵام مامۆستایانی وانە بێژ دابمەزرێن و فەرمانی دامەزراندنیان بۆ دەربكرێت.
سەرۆكی خولی یەكیتی مامۆستایانی كوردستان ئەوەشی خستەڕوو، ئەگەر حكومەتی هەرێم نییەتی هەبێت چارەسەری بایكۆتی مامۆستایان بكات دەتوانێت بە بڕیارێك دەستبکات بە پلەبەرزكردنەوەی مامۆستایان و هەروەها دامەزراندنی مامۆستایانی وانەبێژ بەوجۆرەش بەدڵنیایی كۆتایی بە بایكۆتی هۆڵەكانی خوێندن دێت، بەڵام بەم دۆخەی ئێستاوە كە حكومەت خۆی خستووەتە بەرەیەكی دژ بە مامۆستایان دۆخەكە هیچ بەرەو باشبوون ناچێت و خوێندكارانیش باجی ئەو دۆخە دەدەن.
