سودانی هەلی کاری بۆ 2000 مامۆستا بە شێوەی گرێبەست راگەیاند

SNN

سەرۆکوەزیرانی عێراق، رەزامەندی لەسەر دامەزراندنی 2000 مامۆستا بەشێوەی گرێبەست پەسەند کرد، کە هەلی کارەکان بۆ پارێزگای نەجەف دەبن.

ئەمڕۆ چوارشەممە 20ی کانوونی یەکەم، محەمەد شیاع سودانی سەرۆکوەزیرانی عێراق، ڕەزامەندی دەربڕی لەسەر بڕیاری دامەزراندنی دوو هەزار مامۆستای بەشێوەی گرێبەست لە پارێزگای نەجەف.

ماجد وائیلی پارێزگاری نەجەف بە ئاژانسی هەواڵی عێراقی ڕاگەیاند، ژمارەی ئەو مامۆستایانەی سەربەوەزارەتی پەروەردەن کە بڕیاری دامەزراندنیان بەشێوەی گرێبەست بۆ دەرچووە لە 2000 کەس پێکدێن.

ئاماژەی بەوەکردووە، پەسەندکردنی بڕیارەکە لەسەر بنەمای کۆمەڵێک ڕاگۆڕینەوە و گفتوگۆ و داواکاری نوسینگەی پارێزگاری نەجەف و سکرتاریەتی گشتی ئەنجومەنی وەزیران و نوسینگەی سەرۆکوەزیراندابووە.

ئەمە لە کاتێکدایە، مامۆستایانی وانەبێژ لە بەشێک لە شار و شارۆچکەکانی هەرێمی کوردستان سێ مانگە بە نزیکەی90 رۆژە بایکۆتی هۆڵەکانی خوێندنیان کردووە، جگە لە پێدانی مووچەکانیان داوای دامەزراندن دەکەن و بکرێنە هەمیشەیی.