ئەو کەسانەی ستایشی رژێمی بەعسیان دەکرد سزایی پێنج ساڵ زیندانیکردنیان بۆ دەرچوو
SNN
دەزگای ئاسایشی نیشتیمانی عێراق رایگەیاند، ئەو کەسانەی لە کەرکوک کە ستایشی رژێمی بەعسیان دەکرد دەستگیرکراون و لەلایەن دادگای تاوانەکانی کەرکوکەوە پێنج ساڵ زیندانیان بەسەردا سەپێندراوە.
ئەمڕۆ هەینی، دەزگای ئاسایشی نیشتیمانی عێراق راگەیەنراوێکی بڵاوکردووەتەوە و ئاماژەی بەوەکردووە، ئەو 10 کەسەی کە لە ڤیدیۆیەکدا لە کەرکوک دروشمی ستایشیان بەسەر رژێمی بەعس و سەدام حسێندا دەوتەوە دەستگیرکراون.
ئەوەشخراوەتە ڕوو، بەپێی یاسای قەدەغەی حزبی بەعسی ژمارە (32)ی ساڵی 2016 مامەڵەیان لەگەڵ کراوە و دادگای تاوانەکانی کەرکوک سزای پێنج ساڵ زیندانی بەسەر ھەریەک لەو 10 کەسەدا سەپاندووە.
لە راگەیەنراوەکەدا هاتووە، ئەو کەسانەشی لە تۆڕە کۆمەڵایەتیەکانیش برەویان بەو دروشمانە داوە و لە کاتی وتە لێوەرگرتنیشدا پشتیوانییان بۆ حزبی بەعس دەربڕیوە لێپێچینەوەیان لەگەڵدا دەکرێت.
