سلێمانی ئارامترین شەوی ساڵی بەڕێکرد و لە هەولێریش 54 کەس بریندار بوون

SNN-

پۆلیسی سلێمانی دەڵێت: سلێمانی ئارامترین شەوی ساڵی بەڕێکردووە و هیچ رووداوێکی نەخوازراو رووینەداوە، تەندروستی هەولێریش دەڵێت: لە شەوی سەری ساڵدا 54 کەس بە هۆکاری جیاواز برینداربوون.

سەرکەوت ئەحمەد لێپرسراوی راگەیاندن و پەیوەندییەکانی پۆلیسی سلێمانی رایگەیاند، ئەو پلانە ئەمنییەی لەلایەن لیژنەی باڵای ئەمنی سلێمانییەوە دانرابوو بۆ شەوی سەری ساڵ بە سەرکەوتوویی جێبەجێکرا و هیچ حاڵەتێکی نەخوازراو رووینەداوە و تەنها سێ حاڵەتی شەڕکردنی گەنجان هەبووە کە یەکێکیان سکاڵای تۆمارکردووە و تۆمەتبارەکەش دەستگیرکراوە و هیچ حاڵەتێکی دیکە رووینەداوە.

هەروەها بەڕێوەبەرایەتی گشتی تەندروستی هەولێر بڵاویکردووەتەوە،لە شەوی سەری ساڵدا 54 حاڵەتی برینداربوونی جۆراوجۆر تۆمارکراون کە هۆکارەکانیان جیاواز بووە، بەڵام لەلایەن تیمەکانمانەوە چارەسەری پێویستیان بۆ کراوە و رەوانەی ماڵەوە کراونەتەوە.