وتەبێژی سەربازیی سەرۆکوەزیرانی عێراق: داعش تووشی پەرتبوون بووە

SNN-

وتەبێژی فەرماندەی گشتی هێزە چەکدارەکانی عێراق دەڵێت: “کوژرانی حاجی تەیسیر گورزێکی کوشندە بوو لە داعش کەوت و دوای نەمانی خەلیفەکەشیان ئەو رێکخراوە دووچاری پەرتبوون بووە”.

عەمید یەحیا رەسووڵ لەچاوپێکەوتنێکی تەلەڤزیۆنیدا وتی: “هەوڵی زۆر درا تا توانرا والی عێراقی داعش کرایە ئامانج و لەناو برا” وتیشی: “کوژرانی ئەو گورزێکی گەورە بوو لە داعش کەوت”.

ئەوەشی ئاشکرا کرد کە حاجی تەیسیر هیچ هۆکارێکی پەیوەندیکردنی پێنەبووە تا بەئاسانی بدۆزرێتەوە و بە ئەستەم زانیاریمان لەبارەی شوێنی دانیشتنی وەرگرت لەدێرەزووری سوریا.

بەوتەی عەمید یەحیا رەسووڵ لەوەتەی ئەبوبەکر بەغدادی خەلیفەی داعش کوژراوە، رێکخراوەکە تووشی لەبەریەکهەڵوەشانێکی گەورە هاتووە و خۆیان پێناگیرێتەوە.